Ráðið í tvær stöður í miðlægri stjórnsýslu Háskóla Íslands

Gengið hefur verið frá ráðningu í tvær stöður í miðlægri stjórnsýslu Háskóla Íslands. Ingunn Ólafsdóttir hefur verið ráðin til að gegna stöðu innri endurskoðanda og Magnús Lyngdal Magnússon hefur tekið við starfi aðstoðarmanns rektors.

Ingunn lauk BA-prófi í stjórnmálafræði og heimspei frá Háskóla Íslands árið 2001, MPA-prófi í stjórnsýsluprófi frá KU Leuven árið 2002 og MA-prófi í alþjóðasamskiptum frá University of Kent árið 2003. Þá hlaut hún faggildingu sem innri endurskoðandi árið 2013.

Í tilkynningu frá Háskólanum segir að Ingunn hafi víðtæka starfsreynslu, þar á meðal sem sérfræðingur hjá Ríkisendurskoðun frá 2006 til 2013 og sem verkefnisstjóri í áhættuþjónustu Deloitte frá 2013. Þá starfaði hún sem almannatengill í Brussel á árunum 2003 til 2004 og hlaut starfsþjálfun hjá Evrópuþinginu 2004 til 2005.

Magnús lauk BA-prófi í sagnfræði og íslensku frá Háskóla Íslands árið 2000 og MA-prófi í sagnfræði árið 2002. Hann starfaði við rannsóknir frá 2002 til 2007 en var þá ráðinn sérfræðingur hjá Rannís. Þar gegndi Magnús meðal annars starfi aðstoðarforstöðumanns á árunum 2008-2012.

Magnús starfaði sem sérfræðingur á skrifstofu vísinda og háskóla í mennta- og menningarmálaráðuneytinu frá árinu 2012 og þar til hann var ráðinn til Háskóla Íslands árið 2013 og tók þá við starfi skrifstofustjóra Miðstöðvar framhaldsnáms.