Innlent

Vatnið hitnar í Vaðlaheiðargöngum

Sveinn Arnarsson skrifar
Mikill hiti er í göngunum og eru stórir blásarar fyrir utan munnann sem blása lofti inn í göngin
Mikill hiti er í göngunum og eru stórir blásarar fyrir utan munnann sem blása lofti inn í göngin
Heitavatnsrennslið í Vaðlaheiðargöngum vestanverðum er stöðugt og hefur hiti vatnsins náð 63 gráðum. Þegar stóra vatnsæðin kom í ljós síðasta sumar var vatnið um 43 gráður og runnu þá um 350 lítrar á sekúndu úr stafni ganganna. Enn er of mikið kaldavatnsrennsli austanmegin í göngunum til að geta hafið gangagröft þar.

Valgeir Bergmann, framkvæmdastjóri Vaðlaheiðarganga ehf.
Valgeir Bergmann, framkvæmdastjóri Vaðlaheiðarganga, segir verktaka enn vera á svokölluðu blautu svæði í göngunum vestanmegin og því sé framvindan ekki hröð í augnablikinu. Göngin hafa lengst um 25 metra á viku síðustu vikurnar á meðan ekkert hefur verið borað austanmegin síðan kalt vatn fyllti göngin þar.

"Um leið og við komumst úr þessu blauta svæði þá getum við grafið á meiri hraða en nú er gert," segir Valgeir og bendir á að þegar best lét lengdust göngin um eitt hundrað metra á viku sem er talið mjög gott.

„Vatnið er um 63 gráðu heitt og við erum mikið að vinna í efnagraut og bergþéttingum til að halda áfram verkinu. Austan megin er unnið að vegskála og vegaframkvæmdum á meðan ekki er hægt að grafa. Við sjáum samt vatnsrennslið minnka þar og því förum við að sjá forsendur fyrir því að hefja útdælingu á vatninu og byrja að grafa austan megin líka,“ segir Valgeir.

Hann telur þó að göngin verði hægt að opna í lok árs 2017. "Við gerum okkur vonir um það já. Við erum svona að kortleggja hvernig við sjáum framvinduna fyrir okkur og þetta gæti verið orðið klárt fyrir áramót 2017-2018.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.