Ekkert fékkst upp í 180 milljóna króna gjaldþrot Baðhússins

Skiptum er lokið á þrotabúi Baðhússins ehf. sem Linda Pétursdóttir rak um árabil. Samtals námu lýstar kröfur í búið 181,6 milljónum króna en ekkert fékkst greitt upp í þær kröfur, samkvæmt því sem kemur fram í Lögbirtingablaðinu.

Fyrirtækið var tekið til gjaldþrotaskipta 16. janúar síðastliðinn með úrskurði Héraðsdóms Reykjaness og var skiptum lokið 7. ágúst síðastliðinn. Linda fór nýverið yfir reksturinn á Baðhúsinu, heilsulind fyrir konur, í tímaritinu Man en hún sakaði yfirmenn fasteignafélagsins Regins um að hafa eyðilagt rekstur fyrirtækisins.

Sagði hún Baðhúsið hafa orðið fyrir miklum skaða þegar áætlanir um framkvæmdir á nýju Baðhúsi í Smáralind stóðust ekki.

Uppfært klukkan 13:05:

Fasteignafélagið Reginn vill árétta að félagið uppfyllti öll ákvæði leigusamnings sem gerður var á milli Regins og Baðhússins. Reginn gekk reyndar lengra en samningar kváðu á um til að liðka fyrir opnun Baðhússins og tryggja rekstur þess, en án árangurs.