Arnór skoraði í dramatískum sigri í Íslendingaslag

Norrköping vann dramatískan 3-2 sigur á Helsingborg í Íslendingaslag í sænsku úrvalsdeildinni í fótbolta í dag. Sundsvall tapaði á sama tíma á heimavelli.

Norrköping er enn með á fullu í baráttunni um meistaratitilinn þökk sé mark á fimmtu mínútu í uppbótartíma.

Arnór Ingvi Traustason skoraði fyrsta mark Norrköping á 24. mínútu leiksins og þannig var staðan þar til á 56. mínútu.

Arnór Smárason kom þá inná hjá Helsingborg, mínútu síðar jafnaði liðið metin og eftir 22 mínútur var Helsingborgar-liðið komið með forystuna.

Arnór Ingvi og félagar gáfust ekki upp og tryggðu sér sigur með tveimur mörkum í lokin. Sigurmarkið skoraði Andreas Johansson á fimmtu mínútu í uppbótartíma.

Þetta var fimmta mark Arnórs Ingva Traustasonar í sænsku deildinni á tímabilinu þar af annað mark hans í síðustu þremur leikjum.

Guðlaugur Victor Pálsson lék allan tímann með liði Helsingborgar.

Norrköping-liðið er í 4. sæti með jafnmörg stig og AIK sem er með betri markatölu í 3. sæti. Það eru síðan aðeins tvö stig í toppliðin IFK Gautaborg og Elfsborg.

Rúnar Már Sigurjónsson og Jón Guðni Fjóluson léku allan leikinn þegar Sundsvall tapaði 1-0 á heimavelli á móti Falkenberg.

Sundsvall er í 11. sæti deildarinnar en Falkenberg er fjórum stigum neðar í töflunni þrátt fyrir sigurinn.