Vilja að skipulag lóðar Landsbankans við Hörpu verði endurskoðað

Fulltrúar Sjálfstæðisflokksins í umhverfis- og skipulagsráði Reykjavíkur vilja að unnið verði með Landsbankanum að því að finna viðunandi framtíðarstaðsetningu fyrir höfuðstöðvar bankans í borginni.

Fulltrúarnir, þau Júlíus Vífill Ingvarsson og Herdís Anna Þorvaldsdóttir, vilja að skipulag lóðar bankans á Austurbakkanum verði endurskoðað og að efnt verði til samkeppni um nýtingu lóðarinnar. Þá verði leitað eftir hugmyndum frá fagfólki og almenningi um hvernig lóðin muni nýtast best í heildarsamhengi miðborgarinnar.

Fulltúrar meirihlutans lögðu fram eftirfarandi bókun á fundi umhverfis-og skipulagsráðs í gær sem svar við bókun sjálfstæðismannanna:

„Umrædd lóð er í samþykktu skipulagi og er á forræði Landsbankans. Ríki og borg seldu lóðina til bankans eftir útboð árið 2013. Skipulagsáætlanir hafa gert ráð fyrir að byggt verði á lóðinni allt frá því að tónlistarhúsi þjóðarinnar, Hörpu var valinn staður á svæðinu. Uppbygging á lóðinni er mikilvæg, svo þarna verði ekki áfram hola, stórt sár í borgarmyndinni. Þá er líka æskilegt að þarna verði um fjölmennan vinnustað að ræða, sem verður bakland þjónustu og verslunar í miðborginni. Afar mikilvægt er að jarðhæðir nýbyggingarinnar verði opin og lifandi almenningsrými, eins og skipulagið gerir ráð fyrir. Best færi á því að sem allra stærsti hluti jarðahæðanna yrði þannig. Mælist umhverfis- og skipulagsráð til að því verði beint til lóðahafa en vísar fyrirliggjandi tillögu að öðru leyti frá.“