Egils Límonaði uppselt hjá framleiðanda

Egils Límonaði er uppselt hjá framleiðanda mánuði áður en áætlanir gerðu ráð fyrir. Er það svo þrátt fyrir að framleiðslan hafi verið tvöfölduð í kjölfar þess hve vel var tekið á móti drykknum.

„Það er óhætt að segja að þessi mikla sala hafi komið okkur á óvart þó við höfum alltaf haft ómælda trú á vörunni,“ segir Sigurður Valur Sigurðsson vörumerkjastjóri Ölgerðarinnar. „Stefnan var að hafa vöruna í hillum verslana frá miðjum maí fram í miðjan september en strax í byrjun júní var ljóst í hvað stefndi.

Drykkurinn seldist upp og var ófáanlegur í tvær vikur í sumar meðan unnið var að því að útvega aðföng svo hægt væri að hefja framleiðsluna á ný. Það gerðist í byrjun júlí og dalaði salan ekkert. Um verslunarmannahelgina var ljóst að salan var tvöföld á við það sem gert hafði verið ráð fyrir í upphafi. Það er því óhætt að fullyrða að endurkoma Límonaðisins hafi farið vel í landann.

Límonaðið hverfur úr kælum búða í vetur en stefnt er að því að það snúi aftur næsta vor. „Það er aldrei að vita nema við verðum eitthvað fyrr á ferðinni. Við munum einnig skoða hvort tilefni sé til að fara í frekari vöruþróun með Límonaðið,“ segir Sigurður.