Starfsmenn Alcoa Fjarðaráls samþykkja kjarasamning

Atkvæðagreiðslu um kjarasamning AFLs og RSÍ við Alcoa Fjarðaál sem samið var um fyrr í sumar lauk í gær og var hann samþykktur með 90% greiddra atkvæða. Kemur þetta fram í tilkynningu.

Helstu breytingar í nýjum samningi felast m.a. í hækkun grunnlauna og breyttu vinnutímafyrirkomulagi. Þannig mun t.d. vinnustundum vaktavinnufólks á mánuði fækka auk þess sem kveðið er á um viðbætur og hækkanir á launatöflum, árlega hækkun desember- og orlofsuppbóta og samið er um eingreiðslu til starfsmanna. Einnig felur kjarasamningurinn í sér fæðingarstyrk frá Alcoa Fjarðaáli til starfsmanna sinna sem fara í fæðingar- og foreldraorlof.

Magnús Þór Ásmundsson, forstjóri Alcoa Fjarðaáls, kveðst ánægður með samninginn og þann mikla stuðning sem hann fékk meðal starfsmanna í atkvæðagreiðslunni. Hann telur að samningurinn feli í sér mikla kjarabót fyrir starfsfólk Fjarðaáls. Alls voru 393 starfsmenn á kjörskrá en 180 starfsmenn greiddu atkvæði.