Capello gæti verið að missa starfið

Fabio Capello, þjálfari rússneska knattspyrnulandsliðsins, gæti verið að missa starfið samkvæmt fréttum frá Rúslandi, en Sky Sports greinir frá.

Capello er á leið í viðræður við rússneska knattspyrnusambandið þar sem búist er við að samningi hans verði sagt upp.

Ítalinn hefur verið í starfshættu síðan rússneska liðið tapaði fyrir Austurríki í undankeppni EM 2016 fyrr í þessum mánuði.

Rússneska landsliðið er í þriðja sæti í G-riðli og er í hættu um að komast ekki á Evrópumótið í Frakklandi á næsta ári.

Capello er með samning fram yfir heimsmeistaramótið 2018 sem fer einmitt fram í Rússlandi.

Rússneska knattspyrnusambandið hefur átt í erfiðleikum með að greiða Capello ofurlaun hans að undanförnu, en Alisher Usmanov, eigandi Arsenal, gaf sambandinu 3,5 milljónir punda til að gera upp við þjálfarann fyrir skömmu.