Segir fyrirtæki eins og CCP mikilvæg fyrir íslenskt hagkerfi

Samúel Karl Ólason skrifar 22. maí 2015 18:52

Almar Guðmundsson, framkvæmdastjóri Samtaka iðnaðarins. Vísir/Anton

„Við vitum ekki til þess að nokkur ákvörðun hafi verið tekin um að flytja CCP úr landi, eins og fréttir á Vísi og Fréttablaðinu gefa til kynna,“ segir Almar Guðmundsson, framkvæmdastjóri Samtaka iðnaðarins. Hann segir að það liggi hins vegar fyrir að í alþjóðlegum fyrirtækjum sem CCP sé alltaf einhver hreyfing á einstökum hlutum starfsemi á milli landa og ekkert sé óeðlilegt við það.

„Fyrirtæki líkt og CCP eru ákaflega mikilvæg fyrir íslenskt hagkerfi. Það má nefna sem dæmi að fyrirtækið veltir í kringum 10 milljarða og þeirra lang stærsti kostnaðarliður er launakostnaður sem allt samfélagið nýtur góðs af í gegnum launaskatta, þá sér í lagi þar sem þetta eru hálaunastörf. Svona fyrirtæki skapa líka eftirsóknarverð og alþjóðlega samkeppnishæf störf fyrir unga fólkið okkar.“

Þetta kemur fram í svari SI við fyrirspurn Vísis. Almar segir að í heild sinni velti upplýsingatækniiðnaðurinn hér á landi 80 milljörðum og vöxtur hans sé meiri en meðal hagvöxtur.

„Stuðningur stjórnvalda við að skapa þessum fyrirtækjum hagstæða umgjörð skiptir miklu máli. Við þurfum fjölbreyttan iðnað á Íslandi og eigum í því samhengi ekki síst að leggja áherslu á þekkingardrifnar greinar með miklum skalanleika .“

Gjaldeyrishöflin skapa ótrúverðuga mynd

Af þeim 80 milljörðum sem UT geirinn veltir segir Almar að CCP sé með nærri einn áttunda. Því sé fyrirtækið mikilvægt fyrir íslenskt hagkerfi.

„Það er staðreynd sem ekki er hægt að líta fram hjá . Við eigum í mjög góðu samstarfi við stjórnvöld og finnum ekki annað en að þar sé mikill áhugi á að bæta frekar umhverfi þessara fyrirtækja.“

Þar að auki segir Almar að gjaldeyrishöftin séu truflandi og skapi ótrúverðuga mynd af Íslandi sem góðum stað fyrir þekkingarfyrirtæki.

„Þess vegna er mikilvægt að höft verði afnumin hratt. Þannig höldum við mikilvægum fyrirtækjum með fjölbreytta starfsemi í landinu og sköpum grundvöll fyrir breiða flóru fjölbreyttra þekkingarfyrirtækja á Íslandi.“

Tengdar fréttir

CCP eins og stór fiskur í lítilli tjörn

Frosti Sigurjónsson, formaður efnahags- og viðskiptanefndar Alþingis og fyrrverandi stjórnarformaður CCP, segir mikilvægt að ríghalda ekki í stórfyrirtæki þegar þau vilja flytja höfuðstöðvar sínar úr landi. Gjaldeyrishöft eigi ekki stóran þátt í ákvörðun.

21. maí 2015 07:00

Mest lesið

Fleiri fréttir