Starfsmenn Kaupþings fá tug milljóna bónusa verði nauðasamningar samþykktir

Stór hópur núverandi og fyrrverandi starfsmanna slitabús Kaupþings á von á tug milljóna bónusgreiðslum fáist nauðasamningar slitabúsins samþykktir fyrir íslenskum dómstólum. DV greinir frá þessu í dag.

Samanlagt munu bónusgreiðslurnar minnst nema hundruð milljónum króna og gætu jafnvel verið hærri en milljarður króna.

Lykilstarfsmenn og æðstu stjórnendur slitabúanna eiga von á hæstu greiðslunum, sem numið gætu þrjátíu til fimmtíu milljónum króna eða allt að árslaunum þeirra.

Flestir starfsmenn Kaupþings fá hins vegar greidda bónusa sem nema þriggja til sex mánaða launum eða á milli fimm og tíu milljónum króna samkvæmt því sem fram kemur í DV.

Meðallaun í Kaupþingi 1,6 milljónir á mánuði

Meðallaun starfsmanna Kaupþings samkvæmt ársreikningi ársins 2014 voru 1,6 milljónir króna á mánuði. Að meðaltali störfuðu 50 starfsmenn hjá Kaupþingi á síðasta ári.

Samkvæmt upplýsingum DV voru samningarnir gerðir á árunum 2012 og 2013. Þá hafi verið ljóst að áform um að ljúka uppgjöri slitabúsins með nauðasamningum myndu ekki gagna eftir að svo stöddu vegna þess að Seðlabanki Íslands hafnaði því að veita slitabúinu undanþágu frá gjaldeyrishöftum þar sem áætlun um afnám hafta hafi ekki legið fyrir.

Háar greiðslur fyrir stjórnarsetu erlendis

Þá er einnig greint frá því að þeir starfsmenn slitabúsins sem sitji í stjórnum erlendis fái fyrir það umtalsverðar launagreiðslur. Til að mynda sitji Jóhann Pétur Reyndal, yfirmaður eignastýringar Kaupþings og Aurora Fashions sem yfirtók rekstur helstu verslunarkeðja Mosaic Fashions.

Samkvæmt síðasta birta ársreikningi Karen Millen Group hafi launagreiðslur til fimm stjórnarmanna, á rekstarárinu sem lauk í mars 2014, numið 1,4 milljónum punda eða um 290 milljóna króna. Að meðaltali hafi launin því numið 58 milljónum króna á hvern stjórnarmann á ári.