Stýrivextir Seðlabankans óbreyttir

Peningastefnunefnd Seðlabanka Íslands hefur ákveðið að halda vöxtum bankans óbreyttum. Stýrivextir, sem eru vextir á sjö daga bundnum innlánum, verða því áfram 4,5%.

Í yfirlýsingu Peningastefnunefndar kemur fram þróun kjaraviðræðna að undanförnu ásamt hækkun verðbólguvæntinga og vísbendingum um öflugan vöxt eftirspurnar bendi til þess að hækka gæti þurfi vexti á næsta fundi nefndarinnar í júní.

Einnig er bent á að samkvæmt spá Seðlabankans verði hagvöxtur um 4½% í ár og að meðaltali tæplega 4% á ári á spátímanum, sem sé meiri vöxtur en bankinn spáði í febrúar. „Framleiðsluspenna myndast á þessu ári og nær hámarki á því næsta. Batinn á vinnumarkaði hefur færst í aukana að undanförnu. Sé tekið mið af hinum miklu launakröfum sem nú eru uppi mætti ætla að spenna á vinnumarkaði sé nú þegar til staðar eða að slaki hafi a.m.k. minnkað hraðar en samrýmist verðstöðugleika,“ segir í tilkynningu.

Þá er bent á að verðbólga sé enn lítil og lítils háttar lækkun verðlags mælist sé horft fram hjá áhrifum húsnæðiskostnaðar. „Lítil alþjóðleg verðbólga og stöðugt gengi krónu hafa haldið aftur af verðbólgu og vegið á móti áhrifum töluverðra launahækkana innanlands. Verðbólguhorfur hafa hins vegar versnað frá síðustu spá Seðlabankans. Líkur á hagstæðu samspili lítillar innfluttrar verðbólgu og hóflegra kjarasamninga virðast nú hverfandi, enda hafa verðbólguvæntingar hækkað frá síðustu spá eftir að hafa lækkað í markmið í upphafi árs.“

Því gerir grunnspá bankans ráð fyrir að verðbólga fari yfir markmið strax í upphafi næsta árs og meiri líkur sé á að verðbólga verði meiri en spáð en að hún verði minni. Framvinda kjaraviðræðna eftir að spáin var gerð hefur aukið þessa hættu enn frekar.