Sekt Valitor lækkuð í 400 milljónir

„Líta verður til þess að um er að ræða tvö ár þar sem stefnandi gat hegðað sér nánast að vild á markaðnum og misbeitti þeirri stöðu sinni í fjölda tilvika,“ segir í dómi Héraðsdóms Reykjavíkur í máli Valitor gegn Samkeppniseftirlitinu sem féll fyrr í dag.

Hérðasdómur taldi að Valitor hefði misnotað markaðsráðandi stöðu sína á árunum 2007 og 2008 og staðfesti því að mestu fyrri úrskurði Samkeppniseftirlitsins og Áfrýjunarnefndar samkeppnismála.

„Brot stefnanda eru ítrekuð að hluta til. Hann lét sér ekki segjast þrátt fyrir að hafa gengist undir skilyrðin sem fram koma í ákvörðun stefnda nr. 4/2008.  Það gerði hann í nóvember 2007, en rannsókn þess máls hafði hafist nokkru fyrr,“ segir einnig í dómnum.

Hins vegar taldi dómurinn að brotin hefðu náð yfir skemmra tímabil en úrskurður Samkeppniseftirlitsins  sagði til um. Því var sektagreiðsla sem lögð var á Valitor lækkuð úr 500 milljónum króna í 400 milljónir króna.