Vilja aukið samstarf milli birgja og samkeppnisyfirvalda

Stjórn Félags atvinnurekenda (FA) vill beita sér fyrir beinu samtali milli birgja á dagvörumarkaði  og samkeppnisyfirvalda. Stjórnin hefur sent frá sér ályktun þess efnis í kjölfar skýrslu Samkeppniseftirlitsins um stöðu dagvöruverslunar hér á landi. Í skýrslunni komu fram ábendingar varðandi samninga birgja og dagvöruverslana.

Stjórn FA segist fagna ábendingum Samkeppniseftirlitsins um að endurskoða skilarétt dagvöruverslana á vörum. Samkeppniseftirlitið telur að slík ákvæði í samningum leiða til verðhækkunar og sóunar á mat. Verslanir ættu frekar að einbeita sér bjóða viðkomandi vöru á afslætti þegar hún nálgast síðasta söludag að mati Samkeppniseftirlitsins.

Stjórnin telur einnig gott að Samkeppniseftirlitið efni til umræðu um að gæta beri að því að dagvöruverslun í sterkri stöðu geri ekki óhóflegar kröfur til þátttöku birgja í markaðs- og kynningarstarfi segir í tilkynningu.



Stjórnvöld grípi til aðgerða

Stjórn FA tekur undir með Samkeppniseftirlitinu að lítið stoðar fyrir stjórnvöld að gagnrýna verðlag á matvöru ef þau eru sjálf ekki reiðubúin að grípa til aðgerða sem til þess eru fallnar að efla samkeppni.

Stjórnin telur fjölmargar ábendingar Samkeppniseftirlitsins til þess fallnar til að auka samkeppni og stuðla að lægra vöruverði. Þar á meðal er varða afnám samkeppnishamla í landbúnaði, uppbrot Mjólkursamsölunnar í smærri einingar, breytingar á útboði tollkvóta fyrir búvörur og afnám verndartoll.