Tilkynningagjöld bankanna: "Er þetta banki eða glæpafélag?“

Þúsundþjalasmiðurinn Þráinn Bertelsson greiddi reikninga í heimabanka sínum um mánaðamótin eins og fjölmargir Íslendingar. Þótt honum finnist ekki fallegt að hugsa um peninga á sunnudeig tók hann eftir gjöldum er fylgdu greiðsluseðlum af íbúðarlánum hans og konu sinnar. Óhætt er að segja að honum hafi blöskrað.

Þráinn og kona hans eru með tvö íbúðarlán hjá Arion banka. Hann tók eftir því að af hvoru láni þarf hann að greiða nokkur hundruð krónur í svokallað „tilkynningar- og greislugjald“. Hann tekur fram að heimsendar rukkanir á pappír hafi hann afþakkað fyrir þó nokkru. Því er kostnaðurinn á láninu í hans nafni 495 krónur en 595 krónur hjá konu hans.

Sjá einnig:Hvað er bankinn þinn að rukka þig mikið og fyrir hvað?

„Mér finnst það nokkuð þykkt stungin tólg að fara fram á 1100 krónur á mánuði fyrir að upplýsa mann með færslu í heimabanka hver afborgun skuli vera um hver mánaðamót (og ekki óeðlilegt að bankinn liti á það í sínum verkahring og vaxtakostnaður og verðbætur dekkuðu það viðvik) og sérstaklega finnst mér ósvífið að það skuli fylgja sögunni að það kosti okkur ákveðið greiðslugjald að fá yfirleitt að greiða af láninu. “

Færsla Þráins, sem sjá má í heild sinni hér að neðan, hefur vakið mikla athygli. Fjölmargir tjá sig um gjöldin og enn fleirum líkar við færlsu Þráins. Má þar nefna Óðinn Jónsson, fyrrverandi fréttastjóra á RÚV, G. Pétur Matthíasson, upplýsingafulltrúa hjá Vegagerðinni, fjölmiðlafólkið Láru Hönnu Einarsdóttur og Ingimar Karl Helgason auk Harðar J. Oddfríðarsonar hjá Sundsambandi Íslands og Sigurðar Eggertssonar handknattleikskappa.

Líklega eru margir ef ekki flestir, sem eru með íbúðarlán hjá bönkunum, meðvitaðir um gjöldin. Stóru bankarnir þrír innheimta allir „tilkynningar- og greiðslugjöld“ af lánum og koma þau fram í verðskrám bankanna. Gjöldin eru 495 krónur og 595 krónur hjá Arion banka og Íslandsbanka, eftir því hvort fólk fær seðil sendan heim til sín í bréfapósti eða ekki, en 520 krónur eða 635 krónur hjá Landsbankanum.

Þráinn veltir fyrir sér hvort löglegt sé að hafa slík gjöld og þá hvort nokkuð komi í veg fyrir að gjaldið sé tíu sinnum hærra eða lægra.

Sjá einnig:Bandaríkjamenn ættu að læra bankarekstur af Íslendingum

„Nú er ég ekki lögfræðingur svo að ég veit ekki hvort þetta er löglegt en hitt veit ég að þetta er skólabókardæmi um fullkomið siðleysi í viðskiptum.“

1100 krónur á mánuði sé kannski ekki há uppbæð. Sé hins vegar horft til láns til fjörutíu ára sé upphæðin samanlagt nærri hálfri milljón króna. „Er þetta banki eða glæpafélag?“ spyr Þráinn.

Post by Thrainn Bertelsson.

81 milljarður í hagnað

Tilkynnt var á dögunum að hagnaður bankanna þriggja á liðnu ári hefði numið 81 milljarði króna. Margir hafa gagnrýnt þjónustugjöld bankanna og vexti þeirra harðlega í ljósi hins mikla hagnaðar. Forsætisráðherra hefur meðal annars sagt ótækt að almenningur njóti ekki betri kjara í ljósoi hagnaðar viðskiptabankanna.

Allir bankarnir þrír hafa legið undir gagnrýni fyrir að vera með ógagnsæja verðskrá til neytenda þegar kemur að þjónustugjöldum og fyrir að rukka viðskiptavini fyrir nánast allt milli himins og jarðar. Sumu fólki svíður fyrir að borga á annað hundrað krónur fyrir einfalda millifærslu beiðni í gegnum síma, svo dæmi sé tekið.

Höskuldur Ólafsson bankastjóri Arion banka sagði í samtali við fréttastofu á dögunum að bankinn bjóði upp á þrjú hundruð vörur. Eðlilega séu verð mismunandi.

„Við erum að reyna að haga þessu þannig að þeir sem stofna til kostnaðarins borgi fyrir þjónustuna þannig að það sé ekki þannig að einhver sem sé ekki að nýta sér þjónustuna sé að borga fyrir einhvern sem er að nýta þjónustuna.“