Segir dómara í Al-Thani málinu hafi komist að niðurstöðu fyrir fram

Ólafur Ólafsson, einn sakborninga í Al-Thani málinu, segir að dómarar í Hæstarétti Íslands hafi verið búnir að ákveða niðurstöðu málsins fyrir fram í samtali við Reuters. Ólafur fékk fjögurra og hálfs árs fangelsisdóm í málinu.

Ólafur var einnig harðorður í garð íslenskra stjórnmálamanna. Hann sakaði þá um að leggja áherslu á að rannsaka bankamenn til þess að draga athygli frá mistökum þeirra sjálfra.

„Ísland er mjög lítið land... Veggirnir milli stjórnmálamanna og embættismanna eru oft mjög þunnir,“ sagði Ólafur og bætti við:

„Stjórnmálamennirnir ákváðu að leggja áherslu á bankakerfið, í stað þess að skoða hvað fór úrskeiðis í hagkerfinu, sem var á þeirra ábyrgð.“

Ólafur sem er búsettur í Sviss, segir að hann muni koma til Íslands þegar afplánun dómsins hefst. „Það er aldrei gott að stinga höfðinu í sandinn,“ sagði hann.



Sjá einnig: „Íslenskt réttarkerfi hefur dæmt saklausa menn seka“

Ólafur hefur þegar gefið út að hann muni skjóta málinu til Mannréttindadómstóls Evrópu.