Þrjátíu látnir í bardögum um Debaltseve

Að minnsta kosti þrjátíu hafa látist í hörðum bardögum um borgina Debaltseve í austurhluta Úkraínu í dag. Aðskilnaðarsinnar á bandi Rússlandsstjórnar hafa setið um borgina en hersveitir Úkraínuhers reyna nú að halda borginni.

„Fólk flýr borgina þar sem ekkert lát er á bardögunum. Hvorki hiti né vatn berst til fólksins,“ segir lögreglumaður í borginni í samtali við AFP. Debaltseve er hernaðarlega mikilvæg borg þar sem hún tengir fjölda annarra borga í þessum hluta landsins.

Að minnsta kosti sautján óbreyttir borgarar og þrettán hermenn stjórnarhersins hafa látist í átökum síðasta sólarhringinn. Þetta er haft eftir talsmönnum Úkraínuhers og aðskilnaðarsinna.

Nýir bardagar brutust út í kjölfar þess að friðarviðræður sem haldnar voru í Hvíta-Rússlandi um helgina fóru út um þúfur.