Tveir mánuðir í að veiðin byrji

Það hljómar örugglega eins og nett bilun hjá þeim sem hafa engan áhuga á veiði að heyra veiðimenn telja niður þessa dagana.

Fyrsti veiðidagurinn er nefnilega eftir ekki nema tvo mánuði og það er löngu ljóst að óþreyjufullum veiðimönnum fjölgar.  Janúarútsölur veiðibúðanna gáfu veiðimönnum tækifæri til að fara í gegnum dótið og sjá hvað vantaði, sú aðgerð ein og sér kallar fram ákveðna veiðilöngun svo ekki sé talað um þegar búið er að kaupa nýtt dót sem bókstaflega kallar á að prófa vatn í fyrsta skipti.

Einhverjir geta þó dundað sér við að hnýta flugur og sýn leikmannsins á þessa aðgerð að sitja rólegur í stól og binda fjöður á öngul hlýtur að líta út sem hugarró hin mesta.  En það er ekki þannig, í það minnsta ekki alltaf, því um leið og flott fluga hefur fæðst í höndum hnýtarans kviknar á hugmynd um hvar hún skuli prófuð og fullvissan um að hér að hér sé veiðið afbrigði með eindæmum.  Þessa flugu verður að prófa en ekki fyrr en eftir tvo mánuði.  Þetta ærir óstöðugan!

Spennan sem svona margir þættir hafa á stangveiðimenn, þ.e.a.s. biðin eftir fyrsta veiðidegi ársins, prófa nýjar græjur, prófa nýjar flugur og nýja veiðistaði gerir menn ekkert að neinni rólyndistýpu.  Við sem höfum stundað veiði í áratugi erum bara komnir á þann aldur að geta falið þennan óróleika undir fyrstu broshrukkunum.  Undir niðri kraumar spennan og hún fer ekki í ró fyrr en í fyrsta kasti í vor.