Eigendur Kron ósáttir: „Myndir þú kaupa þessa skó með 20 prósenta afslætti?“

Eigendur tískuvöruverslunarinnar Kron verða á fimmtudag með 400 gölluð skópör til sýnis í verslun sinni við Laugaveg 48 í Reykjavík. Um verður að ræða listrænan gjörning vegna dóms sem féll í Hæstarétti í síðustu viku þar sem þeim var gert að greiða tveimur spænskum skóframleiðendum samtals átján milljónir króna. Yfirskrift gjörningsins verður „Myndir þú kaupa þessa skó með 20 prósenta afslætti?“

Afsláttur í stað endurgreiðslu

Hugrún Dögg Árnadóttir, annar eigandi verslunarinnar Kron, segir málið snúast um 400 skópara pöntun sem greitt var fyrir áður en hún var send til landsins. Skópörin hafi öll verið gölluð og því hafi hún krafist þess að framleiðandinn, Sapena Trading Company SL, tæki skóna til baka, á hans kostnað eða framleiði þá að nýju. Hann hafi samþykkt gallana en neitað að taka skóna til baka, en í staðinn boðið afslátt.

„Seljum ekki skóna gallaða með afslætti“

„Við neituðum því, því að sjálfsögðu seljum við ekki skóna okkar gallaða með afslætti. Þarna er hann þá úti með 260 pör sem hann vill að við greiðum svo hann geti sent okkur þá. Það kom ekki til greina af okkar hálfu, segjumst ekki greiða honum meir fyrr en hann taki ábyrgð á þessum 400 pörum sem liggja hjá okkur gallaðir. Eftir þetta fer allt í hnút þar sem okkur semst ekki um þetta mál,“ segir Hugrún.

Kron átti einnig í viðskiptum við fyrirtækið Salvador Sapena, og er í eigu í eigu samnefnds manns. Sonur Sapena stofnaði sitt eigið fyrirtæki, Sapena Trading Company, og tengjast þessi tvö fyrirtæki því fjölskylduböndum. Skuld Kron við fyrirtæki föðurins nam árið 2011 um átta milljónum króna en neitaði íslenska fyrirtækið að greiða skuldina þar sem skór frá fyrirtæki sonarins væru gallaðir.

Sjá einnig: Dómurinn yfir Kron staðfestur

„Á ákveðnum stað segjum við í pósti til þeirra að við munum að sjálfsögðu greiða það sem við skuldum, eins og við höfðum gert síðustu tíu ár. Við segjum jafnframt að það þurfi að reikna út hvað sé rétt, því fyrir gallaða vöru greiðum við ekki. En á þessum tímapunkti vorum við búin að greiða fyrir þessi 400 pör sem öll voru gölluð,“ segir Hugrún.

Þá sökuðu eigendur Kron Salvador jafnframt um að hafa stolið hönnun þeirra, sniðum og framleiða og selja vörur án þeirra heimildar og kveðst Hugrún hafa sannanir fyrir því að það hafi framleiðandinn gert, en um það má lesa frekar hér.

Hugrún kveðst afar sorgmædd yfir niðurstöðu Hæstaréttar. „Þetta er alveg hrikalega dapurt mál og erum við slegin yfir því að dómarinn komist að þessari niðurstöðu. Það er okkur alveg óskiljanlegt að íslenskt réttarfar skuli taka svona á þessu máli og sýnir okkur bara því miður að lítill skilningur er á þessum hönnunarheimi sem við höfum verið að starfa í undanfarin ár. Þetta er alveg hrikalega erfiður heimur að fóta sig í, og þessi dómur sýnir okkur bara að skilningurinn á hönnunarrétt sé enginn,“ segir hún að lokum en skórnir 400 verða til sýnis á Vetrarhátíð Reykjavíkurborgar dagana 5-8. febrúar.

Lesa má niðurstöðu Hæstaréttar hér.