Obama íhugar að útvega Úkraínuher vopn

Barack Obama Bandaríkjaforseti segir Bandaríkjastjórn nú íhuga að útvega Úkraínuher vopn, takist ekki að semja um lausn deilunnar í austurhluta Úkraínu.

Obama sagði Rússlandsstjórn ekki hafa staðið við neinar skuldbindingar sem samið var um í friðarsáttmálanum sem skrifað var undir í hvítrússnesku höfuðborginni Minsk í september.

Obama fundaði nú síðdegis með Angelu Merkel Þýskalandskanslara sem hefur talað gegn því að Bandaríkjastjórn útvegi Úkraínuher vopn. Í frétt BBC segir að Obama sé undir talsverðum þrýstingi heima fyrir að útvega Úkraínuher vopn.

Rússlandsstjórn hefur hafnað ásökunum um að hafa sent mannafla og vopn til aðskilnaðarsinna í austurhluta Úkraínu. Hörð átök hafa staðið milli úkraínska stjórnarhersins og aðskilnaðarsinna í borginni Debaltseve síðustu daga.

Talsmaður Úkraínustjórnar sagði fyrr í dag að níu hermenn og að minnsta kosti sjö óbreyttir borgarar hafi látist í átökum síðasta sólarhringinn.

Vladimír Pútín Rússlandsforseti íhugar nú nýja friðaráætlun sem Merkel og Francois Hollande Frakklandsforseti kynntu fyrir honum í síðustu viku, en hann kennir sjálfur Vesturlöndum um ástandið í Úkraínu.