Al-Thani málið í Hæstarétti: Tekist á um hleranir, trúverðugleika vitna og meint vanhæfi dómara

Hreiðar Már Sigurðsson, Sigurður Einarsson, Ólafur Ólafsson og Magnús Guðmundsson, fyrrverandi stjórnendur og eigendur Kaupþings, voru allir mættir í Hæstarétt snemma í morgun þegar málflutningur í Al-Thani málinu hófst.

Þeir fara fram á frávísun málsins en til vara er krafist ómerkingar á dómi Héraðsdóms Reykjavíkur. Þá fara þeir allir fram á að málskostnaður falli á ríkissjóð.

Fjórmenningarnir voru allir dæmdir í óskilorðsbundið fangelsi í héraði í desember 2013. Eru dómarnir yfir Hreiðari og Sigurði þeir þyngstu sem fallið hafa í efnahagsbrotamáli hér á landi; Hreiðar var dæmdur í fimm og hálfs árs fangelsi og Sigurður í fimm ára fangelsi.

Björn Þorvaldsson, saksóknari hjá sérstökum saksóknara, hóf daginn í Hæstarétti og heldur nú fyrri ræðu sína. Ákæruvaldið fer fram á að refsing ákærðu verði þyngd og að allur sakarkostnaður í héraði og fyrir Hæstarétti falli á þá.

Sjá einnig: Þungir dómar yfir Kaupþingsmönnum

Telja sig ekki hafa fengið aðgang að öllum gögnum málsins

Björn reifaði stuttlega afstöðu ákæruvaldsins til frávísunarkröfu ákærðu og varakröfu þeirra um ómerkingu héraðsdóms. 

Hreiðar Már og Ólafur byggja kröfur sínar um frávísun meðal annars á því að þeir hafi ekki fengið tilhlýðilegan aðgang að gögnum málsins.

Saksóknari sagði útilokað að veita ákærðu aðgang að öllum gögnum máls þar sem gæta þyrfti að þeim viðkvæmu persónuupplýsingum sem finna má í málsgögnum. 



„Það verður að gera þá kröfu til ákærðu að þeir tiltaki þau gögn sem þeir vilja fá aðgang að og þá er hægt að verða við því eftir sem við á. [...] Þá hefði ákærðu verið í lófa lagið að láta reyna á málið fyrir dómi ef þeim fannst aðgangur sinn að gögnunum takmarkaður en það gerðu þeir ekki,” sagði Björn.

Þá vísar Hreiðar Már í frávísunarkröfu sinni til þess að rannsakendur hafi hlustað á símtöl sín við verjanda sinn en slíkt er ólöglegt. Saksóknari sagði alrangt að að hlustað hafi verið á símtölin. Þau mistök hefðu þó verið gerð að að fjórum símtölum ákærða og verjanda var ekki eytt en á þau var aldrei hlustað.

Sjá einnig: Allt sem þú þarft að vita um Al-Thani málið.

Lánaviðskipti sérfróðs meðdómanda við Kaupþing „óheppileg”

Ómerkingarkrafa ákærðu byggist að mestu á þremur atriðum; trúverðugleika vitna, kröfur sem gerðar eru til rökstuðnings dóma og meint vanhæfi sérfróðs meðdómanda í héraðsdómi, Magnúsar Benediktssonar, endurskoðanda.  

Hvað varðar trúverðuleika vitna telja ákærðu það rangt mat hjá héraðsdómi að fundir sem vitni áttu með verjendum hafi rýrt trúverðugleika. Þá er framburður þeirra vitna sem styðja gögn málsins dreginn í efa af ákærðu. 



„Sú staðreynd að verjendur ræddu við vitni hlýtur að verða til þess að rýra trúverðugleika vitna, sérstaklega þegar framburður þeirra var ekki sá sami hjá lögreglu og fyrir dómi,” sagði saksóknari. Þá mótmælti hann því að rökstuðningur héraðsdóms fyrir sakfellingu uppfylli ekki kröfur um dóma í sakamálum og taldi dóminn þvert á móti vel rökstuddan. 



Hvað varðar meint vanhæfi sérfróðs meðdómanda í héraðsdómi þá var greint frá því desember síðastliðnum að hann, endurskoðandinn Magnús Benediktsson, hafði átt í lánaviðskiptum við Kaupþing og Sparisjóð Reykjavíkur og nágrennis (SPRON). 



Í upphafi árs 2013 voru tvö fyrirtæki sem Magnús tengdist tekin til gjaldþrotaskipta en meðal krafna í annað þeirra eru kröfur sem upphaflega voru í eigu Kaupþings og SPRON. Verjendur ákærðu telja þessa staðreynd geta leitt til vanhæfis Magnúsar sem sérfróðs meðdómanda en saksóknari sagði það útilokað. Viðurkenndi hann að þetta væri vissulega óheppilegt en leiddi ekki til vanhæfis.

Blekking og sýndarmennska

Al-Thani málið á rætur að rekja til hlutabréfakaupa sheikh Mohammad Bin Khalifa Al-Thani hinn 22. september 2008 en félag hans keypti 5,01 prósenta hlut í Kaupþingi banka fyrir 25,7 milljarða króna með láni frá bankanum.

Var mál sérstaks saksóknara byggt á því að um sýndarmennsku og blekkingu í viðskiptum hefði verið að ræða til að halda uppi hlutabréfaverði í Kaupþingi og búa til falska eftirspurn eftir hlutabréfum í bankanum.

Áætlað er að málflutningur haldi áfram í Hæstarétti í dag og á morgun.