Stjórnarflokkarnir klofnir í afstöðu til sölu Landsbankans

Andstaða er innan Framsóknarflokksins við áform fjármálaráðherra um sölu á 30 prósenta eignarhlut í Landsbankanum eins og gert er ráð fyrir í fjárlagafrumvarpi. Fjármálaráðherra telur almennt ekki gott að ríkið sé ráðandi aðili á fjármálamarkaði eins og það verður þegar Íslandsbanki verður einnig kominn í ríkiseign.

Ágreiningur stjórnarflokanna um framtíð Landsbankans kom vel í ljós í sérstökum umræðum um sölu ríkisins á hlut í bankanum á Alþingi í dag.

Ásta Guðrún Helgadóttir varaþingmaður Pírata hóf umræðu um einkavæðingu Landsbankans á Alþingi í dag og rifjaði upp hvernig fór síðast þegar íslensku ríkisbankarnir voru einkavæddir.

„Afstaða ríkisstjórnarinnar hefur ekki verið nægjanlega skýr hingað til þegar kemur að því hvort, hvenær eða hvernig á að einkavæða hlut ríkisins í Landsbankanum. Því vil ég spyrja hæstvirtan fjármálaráðherra hvort standi til að selja hluti ríkisins í Landsbankanu. En ríkið á nú 98 prósent í bankanum.

Bjarni Benediktsson fjármálaráðherra minnti á að Bankasýslan væri með tillögur í þessum efnum í undirbúningi varðandi sölu á 30 prósenta hlut ríkisins í bankanum. En Alþingi hefur veitt heimild til þess nokkur undanfarin ár og óskað er eftir slíkri heimild fyrir fjárlög næsta árs.

„Mínar hugmyndir og það sem ríkisstjórnin hefur verið að ræða eru að Landsbankinn verði áfram í ríkiseigu að verulegu leyti. Ég hef talað fyrir því að ríkið haldi á 40 prósenta hlut. Að örðu leyti verði bankinn í dreifðu eignarhaldi,“ sagði Bjarni.

Tveir þungaviktarmenn Framsóknarflokksins eru hins vegar allt annarrar skoðunar en fjármálaráðherra. Frosti Sigurjónsson formaður efnahags- og viðskiptanefndar minnti á að hlutabréf í Arion banka væru til sölu um þessar mundir.

„En í ljósi aðstæðna virðist alls ekki vera tímabært fyrir ríkissjóð að selja 30 prósenta hlut ríkisins (í Landsbankanum) á næsta ári og alls ekki ef ætlunin er að fá viðunandi verð fyrir eignarhlutinn. Það er óhætt að fullyrða að framboð á hlutabréfum í bönkum hefur aldrei verið meira en einmitt nú og við þær aðstæður getur ríkið ekki búist við að fá viðunandi verð,“ sagði Frosti.

Ásmundur Einar Daðason þingflokksformaður Framsóknarflokksins segir nauðsynlegt að svara mörgum spurningum áður en til sölu komi á hlut í bankanum.

„Ætlum við ekki að ráðast í aðskilnað viðskiptabanka og fjárfestingabanka sem nú er orðið stefna allra stjórnmálaflokka sem sæti eiga á Alþingi. Allra stjórnmálaflokka eftir landsfund Sjálfstæðisflokksins. Ætlum við áfram að bjóða upp á verðtryggt fjármálakerfi fyrir fjármálamarkaðina og bankana? Við þurfum að fara fyrst í þessi atriði og þegar við erum búin að svara því hvernig við ætlum að leysa þessi mál er orðið tímabært að tala um það með hvaða hætti eignarhaldinu er best háttað á bönkunum,“ sagði Ásmundur Einar Daðason.