Borgarstjórinn með tvo fallega laxa í Elliðaánum í morgun

Fyrsti laxinn kom upp í Elliðaánum í morgun þegar áin var opnuð fyrir veiði og það var frítt föruneyti við bakkann í morgun.

Reykvíkingur ársins Hanna Sigrún Guðrún Sigurjónsdóttir landaði fyrsta laxinum úr Fosskvörn um 7:30 sem var 4 punda nýgengin hrygna. Dagur B. Eggertsson fékk líka tækifæri til að renna í ánna og undir handleiðslu Ásgeirs Heiðars fór Borgarstjórinn á Breiðuna sem er oft mjög gjöful á þessum tíma, sérstaklega eins og í morgun þegar flóði var rétt nýlokið.

Strax í fyrsta rennsli, klukkan átta, ofarlega á Breiðunni setur Dagur í lax sem hann landaði örugglega. Þetta var frekar smár lax eða um 3 pund sem tók maðk. Þegar laxinum hafði verið landað var rennt aftur í Breiðina og þar tók annar lax örfáum mínútum seinna. Sá var greinilega stærri og þurfti aðeins að hafa meira fyrir því að ná honum á land. Dagur landaði þeim laxi sem reyndist vera rúmlega 5 punda hrygna, feit og vel haldin. Þegar Veiðivísir kvaddi árnar voru fleiri laxar sem sáust í ánni svo það er líklegt að það komi fleiri á land í dag. Laxar hafa sést í ánni síðustu daga og það verður gaman að fylgjast með ánni á næstunni og sjá hvernig göngurnar skila sér í hana.