Þrír Ísraelar féllu og yfir tuttugu særðust í árásum

Hrina árása skall á höfuðborg Ísraels, Jerúsalem, í gær. Þrír féllu og að minnsta kosti tuttugu særðust. Frá þessu greindi ísraelska lögreglan í gær.

Tveir farþegar voru myrtir þegar jafn margir árásarmenn réðust inn í strætisvagn í borginni og skutu menn og stungu áður en þeir féllu fyrir hendi lögreglu.

Þá féll annar Ísraeli eftir að hafa verið keyrður niður af Palestínumanni og stunginn í hverfi rétttrúnaðargyðinga í borginni. Að auki lést einn Palestínumaður í borginni Betlehem í gær eftir átök við lögreglu.

Lögregla í Ísrael sagði í tilkynningu sinni í gær að tugir Ísraela lægju í valnum eftir mikla öldu stunguárása Palestínumanna undanfarnar vikur. Þá segir í tilkynningunni að álíka margir árásarmenn hafi fallið og sautján almennir palestínskir borgarar hið minnsta.

„Ísraelsríki mun ná sér niðri á morðingjunum. Þeim sem reyna að myrða og öllum þeim sem leggja þeim lið,“ sagði Benjamín Netanjahú, forsætisráðherra Ísraels, er hann lofaði hertum áherslum í öryggismálum á ísraelska þinginu í gærdag.

„Við munum gera allt sem í okkar valdi stendur til að koma á friði,“ sagði forsætisráðherrann.

Mahmoud Abbas, forseti Palest­ínu, kennir Ísraelsmönnum hins vegar um átökin. Í gær sagði Abbas ísraelsk stjórnvöld og ísraelska landtökumenn eiga sökina. Netanjahú svaraði Abbas þá fullum hálsi og bað hann um að „hætta að ljúga“.

En á meðan ráðamenn kepptust við að kenna hvorir öðrum um og almenningur syrgði tóku Hamas-samtökin fréttum gærdagsins fagnandi. „Við lofum hetjudáðirnar í Jerúsalem og tökum ofan fyrir hetjunum sem bera ábyrgð á þeim,“ sagði í tilkynningu samtakanna.