Eiginmaður ráðherra leitar lögfræðings

Sigurður E. Vilhelmsson, eiginmaður Eyglóar Harðardóttur félags- og húsnæðismálaráðherra, stendur í stappi við Landsbankann þessi misserin vegna endurreiknings á ólöglegum lánum sem hann tók. Hann vandar bankanum ekki kveðjurnar og segir að um skítabúllu sé að ræða.

„Þetta snýst ekki um krónur og aura, þetta snýst bara um prinsippið“

Sigurður segir að 18 mánuðir séu síðan hann fór fyrst fram á að Landsbankinn endurreiknaði ólöglega lánið hans og endurgreiddi það sem hann ætti inni hjá bankanum „Það tók þá ekki langan tíma að reikna það út þegar þeir töldu sig eiga inni hjá mér en þetta hefur tekið alveg ótrúlega langan tíma.“

„Bankinn gaf það út fyrir tæpu ári síðan að megnið af lánunum yrði reiknað síðasta sumar. Eitthvað gæti dregist fram á haustið. Fyrir haust var það gefið út að það yrði reynt að klára allt fyrir jól og fyrir jól var mér sagt að þetta gæti dregist fram að áramótum. Síðustu svör sem ég fæ frá þeim gera ráð fyrir að klára endurreikning á fyrri hluta þessa árs og ef það dragist fram yfir júní þurfi ég ekki að hafa áhyggjur af fyrningunni.“

Fyrning hefst á næstu mánuðum

„Það er staðreynd að þessar kröfur byrja að fyrnast núna í sumar og ef það eina sem ég hef í höndunum er tölvupóstur frá þjónustufulltrúa í Landsbankanum um að það muni ekki hafa áhrif þá veit ég ekki hvað gerist ef þeir færu í hart miðað við hörkuna sem þeir hafa sýnt í þeim dómsmálum sem þeir hafa staðið í.“

Aðspurður hvort Sigurður hyggist fara í mál við bankann vegna þess hve lengi hefur dregist að endurreikna lánið segir hann „Fyrstu skref eru að skipta um viðskiptabanka og svo sé ég bara til hvernig þetta vinnst hjá þeim. Ég er allavega farinn að líta í kringum mig eftir innheimtulögfræðingi."