Vottur af kolvetnum var staðfestur en ekki í vinnanlegu magni, segir í tilkynningu Jarðfeingis, orkustofnunar Færeyja, í dag um nýjustu olíuborun við eyjarnar. Niðurstaðan er vonbrigði fyrir Færeyinga en þetta var önnur holan af tveimur sem boraðar voru í sumar og skilaði hvorug þeirra tilætluðum árangri.
Rúni M. Hansen, framkvæmdastjóri hjá Statoil, sem fór fyrir báðum verkefnunum, segir þó að þýðingarmiklar upplýsingar hafi fengist, sem muni nýtast í frekari olíuleit hjá Statoil. Johan Dahl, atvinnumálaráðherra Færeyja, fagnar því að borunin hafi tekist vel og örugglega um leið og hann lýsir vonbrigðum með að ekki hafi tekist að staðfesta kolvetni í vinnanlegu magni. Hann segir að olíuleitin muni halda áfram og framundan séu mikil tækifæri fyrir Færeyinga að byggja upp þjónustu fyrir olíustarfsemi á alþjóðavísu.
Jan Müller, framkvæmdastjóri Samtaka olíuleitarfélaga í Færeyjum, segir næstu mánuði fara í að meta stöðuna. Hann hughreystir menn með því að nú muni hugsanlega sannast að aðeins vanti einn brunn enn. Venjulega séu tíu brunnar boraðir fyrir hvern olíufund. Nú sé bara búið að bora níu holur við Færeyjar.
Aldrei fyrr hefur jafnmikið verið lagt undir í olíuleit við Færeyjar en talið er að boranirnar í ár hafi kostað olíufélögin sem að þeim stóðu allt að fjörutíu milljarða króna. Seinni holan, kölluð Súla/Stelkur, var boruð niður á 3.015 metra dýpi undir 1.050 metra djúpum hafsbotni suðaustur af Færeyjum skammt frá lögsögumörkunum við Bretland. Handan miðlínunnar, á landgrunni Hjaltlandseyja, hafa þegar fundist miklar olíulindir.
Víkingur R.
KR
