Höfuðbuff eru ógeð

Berglind Pétursdóttir er textasmiður á auglýsingastofu, danshöfundur og heldur úti vefsíðunni sívinsælu, berglindfestival.net.

1. Þegar ég var ung þá ætlaði ég að vinna sem … kennari, því kennararnir mínir voru svo dásamlegir. Góðir kennarar eru gjafir jarðar.

2. En núna er ég … hugmynda- og textakona á Íslensku auglýsingastofunni, dansari, danshöfundur, greinaskrifari, DJ Pínulítið Dj og allskonar bara.

3. Ég mun eflaust aldrei skilja fólk sem er … virkt í (leiðinlegum) athugasemdum.

4. Ég hef ekki sérstakan áhuga á … þessu 5 daga djús-detoxi sem ég er að klára. Mig langar mjög í samloku.

5. Karlmenn eru … margir frekar nettir.

6. Ég hef lært að maður á alls ekki að … lita hárið á sér bleikt ef maður er viðkvæmur fyrir skoðunum miðaldra kvenna á kaffihúsum.

7. Ég fæ samviskubit þegar … ég borða eftirréttinn á undan kvöldmatnum.

8. Ég slekk á sjónvarpinu þegar … Nigella laumast í ísskápinn um miðja nótt á silkislopp.

9. Um þessar mundir er ég mjög upptekin af … nýja sjónvarpinu sem ég keypti í sumarlægðinni. Er búin að horfa á um það bil hundrað heimildarmyndir í rigningunni í sumar.

10. Ég vildi óska þess að fleiri vissu að … höfuðbuff eru ógeð.