Gólfið dúar þegar það er fullt

„Aðalsjarminn er þegar dansgólfið sjálft er orðið það fullt af fólki að það byrjar að dúa og þar af leiðandi dansar fólkið sjálfkrafa,“ segir Halla María Halldórsdóttir, einn skipuleggjenda Ögurballsins sem fer fram í Ísafjarðardjúpi. Ásamt henni sjá systkyni hennar sex um skipulagningu.

Stuðbandið Halli og Þórunn sér um að skemmta fólki á ballinu. „Þau hafa spilað þarna síðan við tókum við þessu og eru æviráðin. Þau taka þó pásu og það er misjafnt hver skemmtir í pásum.“ Í fyrra skemmti Erpur Eyvindarson fólkinu í pásunni en hann var einmitt að skemmta sér á ballinu. Halla María vill þór ekki gefa upp hver komi fram í pásunni í ár.

Ein af hefðunum sem systkinin halda í er hinn margumtalaði rabbarbaragrautur með rjóma. „Við bjóðum upp á hann í danspásum.“ Rabbabaragrauturinn hefur ávallt verið hluti af ballinu en fólk sem kom ýmist, siglandi, ríðandi eða gangandi á ballið, fékk rabbabaragraut til þess að fá nægja orku til að koma sér heim eftir ballið.

Tjaldstæði er á staðnum og getur hver sem er mætt á ballið sem náð hefur átján ára aldri. Allur ágóði rennur óskiptur til viðhalds og uppbyggingar samkomuhússins í Ögri sem er gamalt ungmennafélagshús frá árinu 1926.