Hætti í Biggest Loser vegna ósættis

Einkaþjálfarinn Jillian Michaels er alveg hætt í þættinum The Biggest Loser vestan hafs eftir tíu ára þátttöku.

„Ég vil ekki að aðdáendur haldi að mér finnist ég of fræg fyrir þáttinn eða að ég sé að leita að einhverju öðru. Ég er mjög þakklát fyrir þetta tækifæri og er leið yfir því að fara,“ segir Jillian í viðtali við tímaritið People. Hún segist hafa hætt vegna ósættis við framleiðendur þáttanna.

„Í byrjun þáttanna var sýnt hve hörð ég er en líka ástrík,“ segir Jillian og bætir við að upp á síðkastið hafi hún aðeins verið sýnd sem hörð.

„Samböndin sáust ekki og ekki tengingin sem ég byggi við skjólstæðinga mína.“ Þar af leiðandi hafi margir litið neikvæðum augum á hana. Það hafi síðan haft áhrif á einkalíf hennar með kærustunni Heidi Rhoades og tvíburum þeirra sem eru fjögurra ára.