Leikstýrir í fyrsta sinn í Los Angeles

„Ég hef svo sem ekki hugmynd um af hverju ég var beðinn um að leikstýra söngleiknum en það er líklega út af því að það þekkir enginn sýninguna eins vel og ég,“ segir tónlistarmaðurinn Jökull Ernir Jónsson sem þreytir frumraun sína sem leikstjóri í barnasöngleik um Mjallhvíti í Los Angeles.

Sýningin er sett upp af leikfélagi sem kallast The Smiley Face and the Frown Entertainment Group og var sett upp fyrir sýningarhátíð sem kallast The 2014 Hollywood Fringe Festival sem fram fór í Cupcake Theater í Hollywood.

„Á hátíðinni voru sýndar um tvö hundruð mismunandi sýningar og um sextíu sýningar fengu svokölluð Fringe Expansion Awards, sem þýðir framlenging á sýningunni þannig að við erum að fara að halda áfram með sýninguna okkar í leikhúsinu sem er ákaflega ánægjulegt,“ útskýrir Jökull Ernir.

Hann segir að sýningin hafi gengið mjög vel og uppselt hafi verið á hverja sýningu en hún var frumsýnd í júnímánuði og gekk í þrjár vikur og fer aftur í sýningu í næsta mánuði.

Jökull Ernir kom fyrst að áðurgreindum söngleik fyrir um tveimur árum. „Söngleikurinn var upphaflega settur upp af leikhópnum Lottu á Íslandi og fjallar um ævintýri Mjallhvítar en það er þó meira stuðst við Grimms-útgáfuna heldur en Disney. Anna Bergljót Thorarensen skrifaði söngleikinn. Fyrir tveimur árum bað vinkona mín og meðlimur leikhópsins Lottu, Andrea Ösp Karlsdóttir, mig um að aðstoða sig við að þýða söngleikinn. Hún var í leikfélaginu The Smiley Face and the Frown Entertainment Group og var söngleikurinn settur upp fyrir tveimur árum en þá skipaði ég stöðu tónlistarstjóra,“ segir Jökull Ernir spurður út í upphafið.

Þegar söngleikurinn var settur upp í Los Angeles fyrir tveimur árum var flogið sérstaklega með Önnu Bergljótu til Los Angeles til þess að leikstýra uppfærslunni.

Jökull Ernir, sem meðal annars samdi nýja tónlist við söngleikinn, útskrifaðist úr tónlistarskólanum Musicians Institute undir lok ársins 2012. Hann er með nóg af verkefnum á sínum snærum og er meðal annars að semja nýjan söngleik með leikfélaginu, ásamt því að koma fram með hljómsveitinni sinni The Evening Guests, sem vakið hefur talsverða lukku vestanhafs.

Leikfélagið The Smiley Face and the Frown Entertainment Group var stofnað árið 2011 en einn af stofnendum þess er leikkonan Andrea Ösp Karlsdóttir. Markmið félagsins er að útvega skapandi listamönnum fagmannlegt atvinnuumhverfi í Los Angeles og næsta nágrenni. Félagið útvegar listamönnum grunnfjármagn til að hjálpa til við að leyfa verkefnum að líta dagsins ljós en stjórn félagsins ákveður hvaða verkefni fá fjármagn hverju sinni.