Litríkasta hlaup heims hlaupið hér á landi

„Þessi viðburður er mjög skemmtilegur og óvenjulegur en hann var settur á laggirnar til að vekja athygli á heilsu og hamingju einstaklingsins,“ segir Davíð Lúther Sigurðsson, sem stendur fyrir The Color Run sem fram fer í fyrsta skipti hér á landi næsta sumar.

Um heldur óhefðbundið hlaup er að ræða en þátttakendur hlaupa, skokka eða ganga fimm kílómetra og fara í gegnum svokallaðar litastöðvar við lok hvers kílómetra. Hlaupið var fyrst haldið árið 2012 en síðan hefur það náð gríðarlegri útbreiðslu og er í dag haldið um heim allan.

„Allir þurfa að fara í gegnum hlið þar sem starfsmenn taka á móti þátttakendum og dúndra yfir þá einhverjum ákveðnum lit. Fyrsta hliðið gæti til dæmis verið bleikt og það næsta blátt og svo koll af kolli. Við endamarkið verður svo haldið heljarinnar partí þar sem alls konar lit verður kastað yfir áhorfendur og plötusnúðar þeyta skífum,“ segir Davíð, en liturinn sem um ræðir er unninn úr kartöflumjöli. 

Davíð kynntist hinu litríka hlaupi í Herning fyrr í sumar. 

„Ég sá þetta fyrst fyrir mörgum árum og setti þetta á „bucket-listann“ hjá mér. Ég skellti mér svo til Danmerkur núna í júní ásamt félaga mínum og þetta var svo skemmtilegt að við spurðum Danina hvort það væri ekki möguleiki að koma þessu til Íslands. Við hittum þá svo eftir hlaupið og náðum samningum,“ segir Davíð, en þeir félagarnir eru í samstarfi við Höfuðborgarstofu og fer hlaupið því að öllum líkindum fram í miðbæ Reykjavíkur.

Davíð hvetur alla til þess að taka þátt. 

„Það er ekkert aldurstakmark svo fjölskyldan getur öll gert sér glaðan dag. Eina krafan fyrir þátttöku er að mæta í hvítu svo allir litirnir fái að njóta sín.“

Sex þúsund manns í fyrsta hlaupinuBandaríkjamaðurinn Travis Snyder blés til fyrsta hlaupsins árið 2012 til að hvetja atvinnu- og áhugamenn til að hlaupa saman til gamans. 

6.000 þátttakendur voru í fyrsta hlaupinu í Phoenix í Arizona. 

The Color Run var síðan haldið í rúmlega fimmtíu borgum í Norður-Ameríku árið 2012 og fór þátttakendafjöldi yfir 600.000.

Hlaupið var í yfir 130 borgum í Bandaríkjunum, Suður-Ameríku, Evrópu, Suður-Afríku og Ástralíu árið 2013.