Skipstjóri sökkvandi ferju kom sér snemma frá borði

Mögulegt er að fleiri af farþegum suður-kóreskrar farþegaferju sem hvolfdi á fimmtudagskvöld hefðu bjargast ef skipstjóri ferjunnar hefði gefið fyrirmæli um að yfirgefa skipið fyrr.

Lögregla og saksóknari hafa farið fram á það við dómstóla að fá að handtaka skipstjóra ferjunnar og tvo aðra skipverja.

Skipstjórinn var ekki í brú skipsins þrátt fyrir að siglt hafi verið á hafsvæði þar sem þess er krafist, lögum samkvæmt. Þá forðaði hann sér snemma frá borði í stað þess að stýra björgunaraðgerðum.

„Skipstjórinn forðaði sér frá borði á undan farþegunum,“ segir Yang Jung-jin, saksóknari sem fer með rannsókn málsins.

Rannsókn á ástæðum þess að ferjunni hvolfdi miðar lítið, en komið hefur í ljós að hún beygði skarpt rétt fyrir slysið. Ástæða þess að skipið beygði hefur ekki verið gefin upp.

Alls voru 476 um borð í ferjunni, flest börn á leið í skólaferðalag. Staðfest hefur verið að 174 komust af, 28 eru látnir og 274 er enn saknað. Einn þeirra sem komust lífs af, aðstoðarskólastjóri sem hafði umsjón með stórum hópi barna á ferjunni, stytti sér aldur í gær. Í sjálfsvígsbréfi hans kom fram að hann gæti ekki afborið að hafa lifað af þegar svo mörg börn í hans umsjá létust.

Kafarar leita nú að líkum um borð í skipinu en lélegt skyggni undir yfirborði sjávar torveldar leitina verulega.