„Æðislegt að hlusta á svona sérfræðing“

„Þetta var flott byrjun og ég var ánægður með strákana. Það gerðu allir það sem ætlast var til af þeim. Það voru allir að skila sínu í þessum leik,“ sagði fyrirliðinn Guðjón Valur Sigurðsson eftir sigurinn sæta á Norðmönnum í gær.

Guðjón sagði að allir leikmenn Noregs væru miklir heiðursmenn en hann hefur ekki sömu sögu að segja af norska handboltasérfræðingnum sem sagði þetta íslenska landslið vera það lélegasta sem Ísland hefði teflt fram á öldinni.

„Það er æðislegt að hlusta á svona sérfræðing. Ég efast um að norsku leikmennirnir séu glaðir með þetta. Norsku leikmennirnir bera virðingu fyrir okkur. Það þurfti enga aukahvatningu fyrir þennan leik en það var ágætt að fá hana samt,“ sagði fyrirliðinn og glotti við tönn.

„Við spiluðum af svipaðri getu og ég bjóst við en ég átti ekki von á þessari frábæru byrjun. Norðmenn eru með mjög frambærilegt lið og við vissum að þetta yrði slagur. Við réðum vel við allt þeirra og hleyptum þeim aldrei of nálægt okkur.“

Spila ekki nema ég treysti mér til þess

Óvissa var um hvort Guðjón Valur gæti spilað á þessu móti og fáir bjuggust við honum í þessum leik. Það var ekki að sjá að skortur á undirbúningi hamlaði hornamanninum frábæra því hann var stórkostlegur í leiknum og skoraði níu mörk.

„Mér leið bara vel og ég spila ekki nema ég treysti mér algjörlega til þess. Þegar ég haltraði aðeins þá rákum við hnén saman. Þetta var ekki kálfinn sem hefur verið að trufla mig. Ég er í fínu lagi og fer ekki í treyju nema ég sé klár í að spila.“

Varnarleikurinn frábær frá upphafi

Landsliðsþjálfarinn Aron Kristjánsson var óspar á brosið eftir leik. Eftir mjög erfiðan undirbúning fyrir EM blómstruðu strákarnir hans gegn Noregi í gær.

„Við vissum eiginlega ekki alveg við hverju mátti búast. Við vorum mjög vel undirbúnir fyrir þennan leik. Áttum fín svör við þeirra leik og varnarleikurinn var frábær frá upphafi. Við gátum því refsað með hraðaupphlaupum. Sóknarleikurinn var svo mjög beittur nánast allan leikinn,“ sagði Aron en hann gat ekki kvartað yfir ótrúlegri byrjun sinna manna.

Ungverjar með klóka leikmenn

„Það var búið að vinna í því að stilla spennustigið vel fyrir fyrsta leikinn og það virðist hafa virkað,“ sagði þjálfarinn en umræða var í Noregi um lélegt íslenskt lið. Gat hann ekki nýtt sér það? „Jú, að sjálfsögðu. Við nýttum okkur það og fleira. Við reyndum að vekja dýrið í okkur fyrir leik og það gekk upp. Dýrið var til staðar en samt yfirvegun.“

Ungverjar bíða handan við hornið og verður mikil vinna hjá þjálfarateyminu að undirbúa liðið fyrir þann leik, en hvað þarf helst að bæta?

„Þeir eru öðruvísi lið. Hávaxnari, sterkir en seinir á fótunum. Vörnin verður að halda gegn þeim enda þeir með klóka leikmenn,“ sagði Aron en hann var sjálfur klókur í dag. Rúllaði liðinu vel og skipti rétt inn á. Klassaframmistaða hjá honum rétt eins og hjá leikmönnunum.