NBA: Golden State vann áttunda sigurinn í röð á flautukörfu Iguodala

Andre Iguodala tryggði Golden State Warriors eins stigs sigur á Atlanta Hawks þegar hann skoraði þriggja stiga flautukörfu í NBA-deildinni í körfubolta í nótt. Los Angeles Clippers vann Dallas en missti leikstjórnandann sinn Chris Paul sem fór úr axlarlið. Pau Gasol átti góðan leik í sigri Los Angeles Lakers, Toronto Raptors liðið vann sinn fimmta leik í röð og James Harden skoraði 37 stig í sigri Houston Rockets á New York.

Stephen Curry skoraði 22 stig og gaf 9 stoðsendingar þegar Golden State Warriors vann 101-100 útisigur á Atlanta Hawks en þetta var áttundi sigurleikur liðsins í röð. David Lee skoraði 23 stig fyrir Golden State og Klay Thompson var með 21 stig. Atlanta Hawks var fimmtán stigum yfir í fjórða leikhlutanum en það dugði ekki til. Kyle Korver skoraði þriggja stiga körfu í 102. leiknum í röð og bætti enn við NBA-metið sitt.

DeAndre Jordan setti persónulegt met þegar hann skoraði 25 stig í 119-112 sigri Los Angeles Clippers á Dallas Mavericks. Blake Griffin var einnig með 25 stig og Chris Paul skoraði 19 stig áður en hann fór út axlarlið um miðjan þriðja leikhluta. Paul verður væntanlega frá í þrjár til fimm vikur. Dirk Nowitzki skoraði 24 stig fyrir Dallas.

Pau Gasol var með 23 stig og 17 fráköst þegar Los Angeles Lakers vann 110-99 sigur á Utah Jazz. Kendall Marshall varð sjötti leikmaður Lakers til að byrja sem leikstjórnandi og hann átti fínan leik, skoraði 20 stig og gaf 15 stoðsendingar. Fjórtán leikmenn hafa nú byrjað leik hjá Mike D'Antoni, þjálfara Lakers, í vetur. Gordon Hayward skoraði mest fyrir Utah eða 22 stig.

DeMar DeRozan skoraði 20 stig og Kyle Lowry var með 19 stig og 11 stoðsendingar þegar Toronto Raptors fagnaði sínum fimmta sigri í röð með því að vinna 101-88 útisigur á Washington Wizards.

James Harden var með 37 stig þegar Houston Rockets vann 102-100 sigur á New York Knicks. Aaron Brooks setti niður síðustu stigin af vítalínunni og New York tókst síðan ekki að nýta tvö skot í lokasókninni.  Iman Shumpert skoraði 26 stig fyrir New York og Carmelo Anthony var með 25 stig.

Anthony Davis skoraði 23 stig og tók 9 fráköst þegar New Orleans Pelicans vann 95-92 útisigur á Boston Celtics. Tyreke Evans var með 16 stig og mjög mikilvæga körfu á lokakafla leiksins. Ryan Anderson, leikmaður New Orleans, var hinsvegar borinn af velli eftir samstuð. Þetta var fjórði sigur Pelicans-liðsins í síðustu sex leikjum. Avery Bradley var stigahæstur hjá Boston með 22 stig.

Úrslit allra leikja í NBA-deildinni í nótt:

Washington Wizards - Toronto Raptors 88-101

Atlanta Hawks - Golden State Warriors 100-101

Boston Celtics - New Orleans Pelicans 92-95

Houston Rockets - New York Knicks 102-100

Dallas Mavericks - Los Angeles Clippers 112-119

Denver Nuggets - Memphis Grizzlies 111-108

Los Angeles Lakers - Utah Jazz 110-99