Íslandsbanki hagnaðist um rúmlega átján milljarða

Íslandsbanki hefur sent frá sér uppgjör fyrir þriðja ársfjórðunginn en þar kemur fram að bankinn hagnaðist um rúmlega átján milljarða á fyrstu níu mánuðum ársins.

Á síðasta ári hagnaðist bankinn um 15,4 milljarða. Arðsemi eigin fjár eftir skatta var 13,8 prósent samanborið við 13,4 prósent á sama tímabili 2013, þrátt fyrir að eigið fé bankans hækkaði um 14 prósent á milli ára úr 160 milljarða króna í 181 milljarða króna.

Hreinar vaxtatekjur voru 20,6 ma. kr samanborið við 21,9 ma. kr. á sama tíma á síðasta ári. Kostnaðarhlutfall bankans hefur lækkað úr 58,4% á árinu áður yfir í 54,4% á fyrstu níu mánuðum þessa árs.

Heildareignir bankans voru 931 milljarðar króna eftir fyrstu níu mánuði ársins samanborið við 866 milljarða í árslok 2013.

„Ég er ánægð með afkomuna á fyrstu 9 mánuðum ársins sem er í samræmi við áætlanir. Það verður þó áframhaldandi áskorun að styrkja grunnreksturinn með kostnaðaraðhaldi og auknum tekjuvexti. Við höfum lagt áherslu á að auka hagkvæmni í rekstri en lækkun á stjórnunarkostnaði var 6,4% milli ára. Útlán til viðskiptavina hafa aukist um 54 milljarða króna á þessu ári,“ segir Birna Einarsdóttir, bankastjóri Íslandsbanka.

„Íslandsbanki hefur alltaf verið sterkur á sviði vöruþróunar á fjármálamarkaði og lagt áherslu á að bregðast við þörfum viðskiptavina á því sviði. Gott dæmi um þetta eru svokölluð fyrstukaupalán sem við kynntum á fjórðungnum en það eru fasteignalán á betri kjörum fyrir þá sem eru að kaupa húsnæði í fyrsta skipti. Við erum einnig stöðugt að þróa Íslandsbanka Appið með nýjum aðgerðum og sjáum 100% aukningu í fjölda færslna frá áramótum en samtals hafa 45 þúsund notendur hlaðið Appinu niður.“

Birna segir að um 5.000 viðskiptavinir Íslandsbanka eiga rétt á leiðréttingu á verðtryggðum húsnæðislánum sínum í tengslum við aðgerðir ríkisstjórnarinnar.

„Leiðréttingin er fjármögnuð með sérstökum bankaskatti og gerir Íslandsbanki ráð fyrir að greiða um 2,4 milljarða króna í þann skatt á árinu. Mikilvægt er að þetta verði tímabundin skattheimta eins og kynnt hefur verið. Aukin skattheimta skekkir mjög samkeppnishæfni íslenskra banka við erlendar fjármálastofnanir í þjónustu við stærri fyrirtæki landsins.“

Hér að neðan má sjá myndbandsupptöku af Jóni Guðna Ómarssyni, fjármálastjóra, þar sem hann ræðir uppgjörið.