Tiger Woods snýr aftur um helgina

Tiger Woods snýr aftur á golfvöllinn eftir rúmlega þriggja mánaða fjarveru um helgina en hann verður með á Quicken Loans National mótinu sem fram fer á hinum sögufræga Congressional velli.

Ástæðan fyrir fjarveru Woods var skurðaðgerð á baki sem hann fór í um miðjan mars en hann hefur misst af síðustu tveimur risamótum vegna hennar.

„Ég er enn smá ryðgaður en það er bara ný áskorun að komast í gott keppnisform,“ sagði Woods í fréttatilkynningu sem hann sendi frá sér í gær. „Ég er nýbyrjaður að geta slegið af fullum krafti aftur en mér finnst eins og nú sé rétti tíminn til þess að koma til baka, ég er mjög spenntur fyrir komandi verkefnum.“

Meðal komandi verkefna hjá Woods er Opna breska meistaramótið sem fram fer á Royal Liverpool vellinum í júlí en hann sigraði það síðast þegar að leikið var á þeim velli árið 2006.

Margir kylfingar á PGA-mótaröðinni hafa fagnað endurkomu Woods, meðal annars fyrrum PGA-meistarinn Keegan Bradley.

„Þegar að Tiger er með þá er spennustigið yfirleitt meira, hann er svo vinsæll og hefur gert svo mikið fyrir golfið. Við þörfnumst hans en fyrst og fremst þarfnast golfíþróttin hans.“

Sýnt verður beint frá öllum hringjum á Quicken Loans National mótinu á Golfstöðinni um helgina.