Selja 300 milljóna kerfi til Noregs

Hátæknifyrirtækið Valka ehf í Kópavogi samdi nýlega við norska fyrirtækið Slakteriet AS um kaup á heildarkerfi fyrir flokkun og pökkun á heilum laxi í vinnsluhús félagsins í Florø í vestur Noregi.

Kerfið mun auka sjálfvirkni í vinnslunni frá því að laxinn er slægður þangað til hann er kominn í lokaðan kassa á bretti. Að auki verður verksmiðjunni stýrt af Rapidfish framleiðslu- og pöntunarkerfinu frá Völku.

Kerfið býður upp á ýmsar nýjungar sem veitir stjórnendum og öðrum starfsmönnum upplýsingar í rauntíma. Til að mynda er mögulegt að nota bæði spjaldtölvur og farsíma til fylgast með framleiðslunni, skrá pantanir, framkvæma gæðaskoðanir og fleira. Þá fylgir kerfinu nýr svokallaður SCADA módúll sem gefur upplýsingar um allar bilanir í kerfinu á grafískan hátt og gerir starfsmönnum kleift að bregðast samstundis við.

Með þessar sölu eru laxavinnslurnar í Noregi með heildarkerfi frá Völku, orðnar þrjár. „Þessi samningur er kærkomin viðbót í sókn okkar inn á laxamarkaðinn,“ segir Helgi Hjálmarsson framkvæmdastjóri Völku. „Við opnuðum nýverið útibú í Noregi og viðskiptin hafa farið vaxandi bæði í laxa- og hvítfiskkerfum. Við leggjum áherslu á vandaðar vörur og á nýsköpun sem skilar auknu virði til viðskiptavinanna.“ bætir Helgi við.

Áætluð uppsetning og gangsetning á nýja kerfinu er í mars.