Sérstakur og Jón Óttar gefa skýrslu vegna hlerana

Héraðsdómur Reykjavíkur úrskurðaði í dag að kalla skuli sérstakan saksóknara, Ólaf Þór Hauksson, og fimm aðra starfsmenn embættisins til skýrslutöku vegna hlerana í tengslum við Al-Thani málið. Á meðal þeirra er Jón Óttar Ólafsson, fyrrverandi starfsmaður sérstaks saksóknara, sem mjög hefur gagnrýnt starfsaðferðir embættisins, og þá ekki síst hleranirnar. Björn Þorvaldsson, saksóknari, hefur kært úrskurðinn til Hæstaréttar.

Hörður Felix Harðarson, lögmaður Hreiðars Más Sigurðssonar, fyrrum forstjóra Kaupþings, fór fram á skýrslutökurnar áður en að málið verður tekið til meðferðar í Hæstarétti. Hreiðar Már var í héraði dæmdur í fimm og hálfs árs fangelsi vegna aðkomu sinnar að Al-Thani málinu.

Hörður Felix fór jafnframt fram á að tveir rannsakendur til viðbótar myndu gefa skýrslu til að varpa ljósi á það hvers vegna Halldór Bjarkar Lúðvíksson, fyrrverandi starfsmaður fyrirtækjasviðs Kaupþings, fékk stöðu vitnis eftir að hafa verið með stöðu sakbornings.

Héraðsdómur féllst ekki á þá kröfu Harðar á þeim forsendum að útskýrt hefði verið skriflega af sérstökum saksóknara hvers vegna réttarstöðu Halldórs var breytt. Hörður segist í samtali við Vísi ekki hafa ákveðið hvort hann kæri úrskurðinn til Hæstaréttar.

Lögmaður Ólafs Ólafssonar, Hákon Árnason, fór einnig fram á að fá að kalla nýtt vitni til skýrslutöku, Eggert J. Hilmarsson, fyrrverandi framkvæmdastjóra lögfræðisviðs Kaupþings í Lúxemborg. Héraðsdómur féllst hins vegar ekki á þá kröfu. Ekki liggur fyrir hvort að sá úrskurður verði kærður til Hæstaréttar, en Ólafur var dæmdur í þriggja og hálfs árs fangelsi í Al-Thani málinu.