Í Batman-buxum í þingsal

„Kannski er forseti þingsins bara mikill aðdáandi ofurhetjunnar eða aðdáandi mín,“ segir Katrín Jakobsdóttir, formaður Vinstri grænna, létt í bragði þegar hún er spurð út í Batman-buxurnar sem hún hefur skartað í þingsal í dag.

Eins og kunnugt er gilda strangar reglur um klæðaburð í þingsal og hafa þingmenn til að mynda verið reknir úr gallabuxum og lopapeysum, eins og Katrín sjálf lenti í þegar hún var menntamálaráðherra.

„Ég fór nú í þessar buxur í morgun af því að það var kalt og ætlaði svo að fara úr þeim en þá fékk ég áskorun um að vera í þeim í þingsal. Ég gat ekki annað en tekið þeirri áskorun.“

Hún segir að það sé alveg eins líklegt að forseti þingsins, Einar K. Guðfinnsson, hafi einfaldlega ekki tekið eftir því að hún væri í Batman-buxum.

„Svo les hann um þetta í fjölmiðlum og fær bara áfall,“ segir Katrín hlæjandi.