Brak úr vélinni mögulega fundið

Flugmenn ástralskra leitarvéla sem þátt taka í leitinni að Airbus þotu AirAsia sem hvarf á Jövuhafi í gær telja sig hafa fundið brak í sjónum sem gæti verið úr vélinni.

Brakið sást á svæði þar sem líklegt er talið að vélin hafi hrapað og eru leitarhópar nú á leið á staðinn. 162 voru um borð í vélinni sem hvarf af ratsjám eftir að hafa lent í slæmu veðri skömmu eftir flugtak frá Surabayja í Indónesíu.

Forsvarsmaður björgunaraðgerðanna segir líklegast að brak vélarinnar QZ8501 sé nú að finna á hafsbotni og að kenningin byggi á hnitum vélarinnar þegar hún hvarf.

Vélin var af gerðinni Airbus A320-200 og var á leið til Singapúr.