Klose jafnaði met Ronaldo þegar Þýskaland og Gana gerðu jafntefli

Þýskaland og Gana gerðu 2-2 jafntefli í G-riðli heimsmeistarakeppninnar í fótbolta í Brasilíu. Öll mörkin voru skoruð í seinni hálfleik.

Það var markalaust í hálfleik og fátt um fína drætti. Liðin áttu í vandræðum með að skapa sér færi og fátt til að gleðjast yfir.

Svo kom hálfleikur og seinni hálfleikur hófst stundarfjórðungi síðar og fyrri hálfleikur var skyndilega fjarlæg minning á leið til gleymsku.

Seinni hálfleikur var allt sem fyrri hálfleikur var ekki. Hraður og fjörugur, fullur af dramatík og sviptingum. Það eina sem vantaði var sigurmark á síðustu mínútunni. En liðin reyndu, það verður ekki tekið af þeim.

Mario Götze hóf þetta allt saman á 51. mínútu þegar hann skallaði sendingu Thomas Müller í hnéið á sér og í netið.

Forysta Þjóðverja dugði í þrjár mínútur eða allt þar til Andre Ayew skoraði með óverjandi skalla. Níu mínútum síðar eða á 63. mínútu kom Asamoah Gyan yfir eftir sendingu Sulley Muntari og Gana skyndilega komið yfir.

Þá leit Joachim Löw þjálfari Þjóðverja á varamannabekkinn og setti tvo gamalreynda refi inn á. Bastian Schweinsteiger og Miroslav Klose komu inn á á 69. mínútu og tveimur mínútum síðar var Klose búinn að jafna leikinn eftir hornspyrnu.

Klose skoraði þar 15. mark sitt á HM og jafnaði markamet hins brasilíska Ronaldo í lokakeppni HM.

Þýskaland er með fjögur stig eftir tvo leiki en þetta var fyrsta stig Gana í keppninni.