Kaupa 20 strætisvagna

Strætó bs. og BL skrifuðu undir samning í dag um kaup á 20 strætisvögnum frá Iveco Bus. Kaupverðið er um 690 milljónir króna og verða vagnarnir afhentir í tvennu lagi. Fyrri hlutinn 1. desember og síðari hlutinn í byrjun næsta árs.

„Þetta er mikilvægur áfangi í þeirri stefnu okkar að vera með reglubundna endurnýjun á vagnaflotanum,“ segir Reynir Jónsson, framkvæmdastjóri, í tilkynningu frá Strætó bs. „Við fáum nýrri og tæknilega fullkomnari bíla sem eykur þægindi viðskiptavina okkar, um leið og þeir skila betri hagkvæmni í rekstri.“

Strætisvagnarnir eru af gerðinni Crossway LE og eru keyptir að undangengnu útboði sem VSÓ sá um fyrir Strætó.

„Mér finnst samskiptin við Strætó hafa verið góð. Það hefur verið unnið faglega að útboðinu alla leið til enda. Við höfum tekið þátt í útboðum í mörg ár og erum mjög ánæðir með þessi faglegu vinnubrögð,“ segir Heiðar Sveinsson, framkvæmdastjóri BL.