Fjármálaráðherra Breta ánægður með íslenskt nýsköpunarfyrirtæki

George Osborne, fjármálaráðherra Breta, hrósaði íslenska fyrirtækinu Meniga í ræðu sinni á fjármálaráðstefnunni Innovate Finance í London í dag.

Osborne var heiðursgestur á ráðstefnunni og sagði meðal annars að hann ætlaði sér að gera Bretland að miðstöð nýsköpunar í fjármálum í heiminum. Þá sagði hann ríkisstjórn landsins ætla að taka rafræna gjaldmiðilinn Bitcoin til skoðunar.

Þá vék Osbourne sér að  þeirri staðreynd að fólk væri að nýta tækni í auknum mæli við kaup, á samfélagsmiðlum og hví ekki þá í bankakerfinu líka? Sem dæmi nefndi hann nýja möguleika í að greina í hvað peningar heimilisins færu, geta millifært beint á fjölskyldu og vini og jafnvel fylgjast með vasapeningum barnanna í farsímanum.

„Það er mögulegt nú með þjónustu á borð við þá sem Meniga, Pay-M og Yoyo bjóða upp á,“ sagði Osbourne í ræðu sinni.