Lifandi markaður gjaldþrota

Veitingastaðurinn og verslunin Lifandi markaður hefur verið úrskurðaður gjaldþrota. Vb.is greinir frá.

Eigendur fyrirtækisins óskuðu eftir gjaldþrotaskiptum en í Lögbirtingarblaðinu í dag kemur fram að Héraðsdómur Reykjavíkur úrskuraði fyrirtækið gjaldþrota þann 4. júlí síðastliðinn.

Verslun og veitingastaðir Lifandi markaðar eru opin þrátt fyrir gjaldþrotaúrskurðinn, en fyrirtækið rekur þrjár verslanir og veitingastaði á höfuðborgarsvæðinu.

Fyrirtækið var í eigu Auðar I, sjóðs í rekstri Auðar Capital sem hefur sameinast Virðingu.

Tap Lifandi markaðar í síðasta ársreikningi, fyrir árið 2012, nam tæpum 44,5 milljónum króna. Árið 2011 nam tapið 47,3 milljónum.