Ræður heimavöllurinn úrslitum enn og aftur?

Leikmenn Hauka og ÍBV fá ekki langan tíma til að jafna sig eftir leik fjögur í Vestmannaeyjum á þriðjudagskvöldið því í kvöld spila þessi tvö bestu handboltalið landsins nefnilega hreinan úrslitaleik um Íslandsmeistaratitilinn.

Þetta er fyrsti oddaleikurinn um Íslandsmeistaratitilinn í fjögur ár og aðeins sá annar á síðustu ellefu árum. Í nítján úrslitakeppnum karlahandboltans frá upphafi hafa úrslitin aðeins fjórum sinnum áður ráðist í hreinum úrslitaleik.

Leikurinn í kvöld er því sjaldgæf veisla fyrir íslenska handboltaáhugamenn sem láta sig örugglega ekki vanta á pallana á Ásvöllum klukkan 19.45 í kvöld.

Heimavöllurinn hefur verið ósigrandi vígi í oddaleikjum síðustu tólf ár sem gerir verkefnið enn vandasamara fyrir Eyjamenn.

Frá sögulegum sigri KA-manna í oddaleik um titilinn 10. maí 2002 hafa farið fram sextán oddaleikir í úrslitakeppni karla og þeir hafa allir unnist á heimavelli. Haukarnir sjálfir hafa unnið fimm þeirra á Ásvöllum, þar á meðal spennuleik við nágrannana í FH í undanúrslitaeinvígi liðanna í ár.

Reynslan úr oddaleikjum er öll Haukamegin því enginn í liði ÍBV hefur tekið þátt í svona leik áður. Haukarnir tryggðu sér níunda Íslandsmeistaratitilinn sinn í oddaleik og geta nú endurtekið leikinn fjórum árum síðar.

Oddaleikirnir í lokaúrslitum karla:

1995

28. mars 1995 Valur – KA 30-27

Fyrri hálfleikur: Jafnt (12-12) Seinni: Jafnt (11-11)

Framlenging: Valur +3 (7-4).

Ólafur Stefánsson, Val  8

Partrekur Jóhannesson, KA 7

Valdimar Grímsson, KA 7

Dagur Sigurðsson, Val 6

Jón Kristjánsson, Val 6

Alfreð Gíslason, KA 6

2001

5. maí 2001 KA – Haukar 27-30

Fyrri: Haukar +4 (14-10) Seinni: KA +1 (17-16)

Rúnar Sigtryggsson, Haukum 10

Halldór Jóhann Sigfússon, KA 10

Óskar Ármannsson, Haukum 7

Guðjón Valur Sigurðsson, KA 5

2002

10. maí 2002 Valur – KA 21-24

Fyrri: Valur +1 (10-9) Seinni: KA +4 (15-11)

Halldór Jóhann Sigfússon, KA 8

Sigfús Sigurðsson, Val 6

Snorri Steinn Guðjónsson, Val 5

Sævar Árnason, KA 4

Jóhann G. Jóhannsson, KA 4

2009

8. maí 2010 Haukar – Valur 25-20

Fyrri: Haukar +1 (10-9) Seinni: Haukar +4 (15-11)

Arnór Þór Gunnarsson, Val 7

Sigurbergur Sveinsson, Haukum 6

Pétur Pálsson, Haukum 4

Björgvin Þór Hólmgeirsson, Haukum 4

Guðmundur Árni Ólafsson, Haukum 4

Sigurður Eggertsson, Val 4