Ræstingakonurnar voru að fá 260 þúsund krónur á mánuði

Talsvert hefur verið fjallað um tíðindi sem bárust frá Eflingu í gær um uppsagnir Stjórnarráðsins á ræstingarfólki. Um 18 konur missa vinnuna, þar af eru sex eldri en 60 ára og sjö á aldrinum 50 til 60 ára. Starfshlutfall er mismunandi en flestar eru að fá greitt miðað við 60 – 70 prósenta starfshlutfall.

Vísir ræddi við Hörpu Ólafsdóttir, yfirmann kjaradeildar Eflingar, og fékk hana til að fara yfir það hvað þessar konur voru að bera úr býtum fyrir vinnu sína.

„Það er verið að greiða eftir stærð svæða sem þær eru með og því mismunandi hversu auðveld yfirferðar stykkin eru. En mér sýnist þær vera að fá að meðaltali um 260 þúsund krónur á mánuði. Lágmarkslaun fyrir ræstingar á almenna markaðnum eru 214 þúsund krónur á mánuði fyrir fullt starf. Þá eru réttindi sem snúa bæði að veikindum og lífeyrissjóðsgreiðslum mun lakari á almenna markaðnum en hjá ríkinu.“

Harpa segir algerlega fyrirliggjandi að það sem til standi að gera með því að bjóða þetta út sé að lækka þessi laun enn frekar. Það liggur í hlutarins eðli; þær byrja frá á grunni, uppsagnarfrestur styttri, veikindaréttur minni, miklu lægri laun ... „þú þarft að hlaupa helmingi hraðar. Öllum forsendum verður breytt og þjónustustigið verður miklu minna. Það er ætlast til þess að viðkomandi hlaupi hraðar fyrir minni laun.“