Aðeins einn farþegi fékk ranga útskýringu

Guðjón Arngrímsson, upplýsingafulltrúi Icelandair, segir að flug Icelandair til Parísar þann 2. ágúst síðastliðinn hafi vissulega verið fellt niður vegna forfalla flugmanns. Félag íslenskra atvinnuflugmanna sendi frá sér yfirlýsingu um liðna helgi þar sem þeir voru ósáttir við að starfsmaður Icelandair hefði tilkynnt farþegum félagsins að flugið hefði verið fellt niður þar sem um verkfallsaðgerðir hefði verið að ræða.

„Þetta var þannig að einn farþegi á þessu flugi fékk fyrir misskilning starfsmanns þá skýringu að flugið hefði verið fellt niður vegna verkfallsaðgerða flugmanna. Það hefur verið leiðrétt við viðkomandi einstakling,“ segir Guðjón í skriflegu svari til Vísis.

Í tilkynningu FÍA kemur fram að í ljósi þess að óvíst sé hve margir aðrir en þeir sem leituðu til FÍA með ósk um skýringu á niðurfellingunni hafi félagið þurft að bregðast við.

Vegna forfalla flugmanns gerði Icelandair árangurslausar tilraunir til að fá flugmenn til að hlaupa í skarðið en án árangurs. Voru sumir tilbúnir að taka verkið að sér fyrir hærri útkallsgreiðslu en vant er. Á það féllst Icelandair ekki.

Flugmaður Icelandair sem Vísir ræddi við segir að það hljóti að teljast óeðlilegt að ætlast til þess af flugmönnum að taka að sér næturvaktir á sama taxta og dagvaktir. Í umræddu flugi frá Íslandi til Parísar og til baka mæti flugmenn suður til Keflavíkur seint um kvöld og skili sér svo heim til sín tólf tímum síðar. Í raun fari þrír dagar í verkefnið þar sem þeir þurfa að passa sig að sofa vel daginn fyrir brottför, svo fari heimkomudagurinn sömuleiðis í svefn og menn séu svo ónýtir, því sem næst þunnir, á þriðja degi.