Sveinn Andri hefur engar áhyggjur af ímynd sinni á Facebook

Ný rannsókn leiðir í ljós að ef auðkennismyndir fólks á Facebook vísa til kynþokka, til dæmis sumarleyfismyndir þar sem sést í nakið hold, hættir fólki til að afgreiða viðkomandi umsvifalaust sem ómarktækan. En, ef um er að ræða hefðbundna passamynd, og jafnvel púkalega, eru fólk talið ábyggilegt og markvert.

Fólk ætti því að hugsa sig um tvisvar áður en það velur forsíðu-mynd af sér á Facebooksíðu sína -- vilji það teljast trúverðugt. BBC greinir frá þessari rannsókn sem gerð var í Oregon Háskóla, en hún leiðir í ljós með ótvíræðum og óyggjandi hætti. Hundrað og átján ungar konur voru fengnar til að meta tvær Facebook-síður sem voru algerlega sambærilegar nema forsíðumyndirnar voru frábrugðnar, eins og áður segir; þar sem forsíðumyndin er lífleg eru orð viðkomandi og það hann hefur fram að færa afgreitt sem léttvægt.

Í raun á þetta ekki að þurfa að koma á óvart en það vekur athygli hversu sterkt ímynd orkar. Einn þeirra sem er afskaplega frjálslegur í fasi á Facebook er Sveinn Andri Sveinsson lögmaður. Auðkennismynd hans nú sýnir hann með sólgleraugu, með fráhneppta skyrtu við pálmatré. Prófíl-myndir Sveins hafa í gegnum tíðina verið líflegar og Sveinn hefur ekki miklar áhyggjur af þessum fréttum.

„Fólk sem tekur sjálft sig alltof alvarlega reynir að gefa af sér alvarlega ímynd á Facebook. Sumir eru bara alvarlegir og taka sjálfa sig hátíðlega og það er þá þeirra mál. Ætli þetta sé ekki, í mínu tilfelli, ekki það að ég taki mig ekki of alvarlega,“ segir Sveinn.

En, ímyndin skiptir meiru en ef til vill menn gera sér grein fyrir? Miklu meiru en það sem sagt er og það sem menn hafa fram að færa?

„Ég held að það séu voðalega fáir sem hafa Facebook-reikning sem velti því fyrir sér hvaða ímynd þeir gefa af sér. Auðvitað eru einhverjir sem eru í því, og þeirra líf gengur þá meira og minna út á einhverja PR-mennsku og almannatengsl, en í 99 prósenta tilvika gefur Facebook nasasjón af karakternum sjálfum,“ segir Sveinn Andri sem ætlar ekki að láta þetta stjórna sér og sínu lífi. Og hann hefur engar áhyggjur af því að sú mynd sem hann gefur af sér á Facebook leiði til þess að orð hans verði léttvæg fundin eða að viðskiptavinir treysti honum ekki.