Stjörnubarn handtekið fyrir að kaupa fíkniefni

Kevin McEnroe, sonur tennisstjörnunnar John McEnroe og leikkonunnar Tatum O'Neal, var handtekinn á þriðjudag í New York fyrir að vera með fíkniefni í fórum sínum.

„Kevin McEnroe var handtekinn fyrir að kaupa fíkniefni þann 15. júlí klukkan 23.15. Hann var kærður fyrir að vera með fíkniefni í fórum sínum,“ segir lögreglan í samtali við tímaritið Us Weekly.

Samkvæmt New York Daily News sást Kevin, 27 ára, á götuhorni að stunda fíkniefnaviðskipti við 22 ára gamlan mann að nafni Niro Meneses. Hann náðist með sex umslög af kókaíni, tuttugu verkjatöflur, tíu morfíntöflur og eina kvíðastillandi töflu.

Móðir Kevins, Tatum, var handtekin árið 2008 fyrir að kaupa krakk í New York og var kærð fyrir að vera með fíkniefni í fórum sínum. Hún leitaði sér meðferðar í kjölfarið en féll árið 2012.

Tatum og John gengu í það heilaga árið 1986 en skildu árið 1994. Kevin er elsti sonur hjónanna en þau eiga líka soninn Sean og dótturina Emily.