Þjóðverjar í undanúrslit á fjórða HM í röð

Þjóðverjar eru komnir í undanúrslit á fjórðu heimsmeistarakeppninni í röð eftir 1-0 sigur á Frökkum í fyrsta leik átta liða úrslitanna á HM í fótbolta í Brasilíu.

Miðvörðurinn Mats Hummels kom aftur inn í lið Þjóðverja eftir veikindi og hann skoraði eina mark leiksins strax á þrettándu mínútu.

Þýskaland er fyrsta þjóðin í sögu HM sem kemst í undanúrslit á fjórum HM í röð en þar munu Þjóðverjar mæta annaðhvort Brasilíu eða Kólumbíu sem mætast seinna í kvöld.

Leikurinn byrjaði vel og fyrri hálfleikurinn var fjörugur. Þjóðverjar voru meira með boltann en Frakkar ógnuðu helst í hröðum sóknum.

Þjóðverjar komust í bílstjórasætið þegar Mats Hummels skallaði boltann í mark Frakka á 13. mínútu eftir frábæra aukaspyrnu Toni Kroos. Frakkar höfðu gert sig líklega í nokkrum góðum sóknum á upphafsmínútunum en voru nú komnir í erfiða stöðu - undir á móti þýsku vélinni.

Þjóðverjar voru með ágæt tök á leiknum en sluppu samt með skrekkinn undir lok hálfleiksins þegar Manuel Neuer varði mjög vel frá Mathieu Valbuena og Karim Benzema tókst að skora úr frákastinu. Benzema var líflegur á lokamínútum hálfleiksins en Þjóðverjar voru enn 1-0 yfir þegar flautað var til hálfleiks.

Frakkar byrjuðu seinni hálfleikinn vel en tókst ekki að skapa sér nógu góð færi þrátt fyrir nokkrar vænlegar sóknir. Leikskipulag Þjóðverja gekk upp og þeir héldu lengstum niðri öllu miðjuspili franska liðsins.

Þjóðverjar fengu síðan nokkur fín færi til að gera út um leikinn ekki síst á lokakaflanum þegar franska liðið fjölgaði mönnum í sókninni.

Karim Benzema fékk ágætt færi í uppbótartíma en Manuel Neuer varði frá honum og Þjóðverjar fögnuðu skömmu síðar sæti í undanúrslitunum.