97 laxar komnir úr Elliðaánum í morgun

Elliðaárnar eru loksins að hreinsa sig eftir að hafa vaxið mikið í vatni og farið í lit síðustu daga en þrátt fyrir erfiðar aðstæður er veiðin að glæðast.

Samkvæmt veiðibókinni voru komnir 93 á land sem búið er að bóka en vitað er um að minnsta kosti 4 aðra laxa sem átti eftir að bóka í morgun.  Þegar það var að fjara út í morgun var greinilegt að lax hafi verið að ganga því nokkrir sáust og stukku í flugurnar á Breiðunni og Sjávarfossi.  Það er líka athyglisvert að sjá að nú þegar hafa tveir laxar veiðst í Höfuðhyl sem er efsti staðurinn í ánni og aðrir tveir á Hrauni sem er jafnan einn vinsælasti staðurinn en hann liggur rétt fyrir neðan Árbæjarlaug.  Það sáust jafnframt laxar á næsta stað þar fyrir neðan sem er ekki síður vinsæll en það er veiðistaðurinn Hundasteinar en þeir laxar vildu þó ekkert taka.  Miðað við gang mála á áin að fara yfir 100 laxa í dag og þá er ekki annað hægt að segja en að gangurinn sé bara ágætur þar á bæ.